အမေရိကန်ရဲ့ ကန့်သတ်ချက်တွေ ပိုတင်းကျပ်လာမှာ စိုးရိမ်ပြီး တရုတ် AI ကုမ္ပဏီတွေ Nvidia Chip စွမ်းဆောင်ရည်တွေ ကြိုတင်ငှားရမ်းနေ

အမေရိကန်ရဲ့ ကန့်သတ်ချက်တွေ ပိုတင်းကျပ်လာမှာ စိုးရိမ်ပြီး တရုတ် AI ကုမ္ပဏီတွေ Nvidia Chip စွမ်းဆောင်ရည်တွေ ကြိုတင်ငှားရမ်းနေ

နိုဝင်ဘာ ၁၂

တရုတ် AI ကုမ္ပဏီတွေဟာ Nvidia ရဲ့ အမှုဆောင်အရာရှိချုပ် ဂျင်ဆန်ဟွမ်ရဲ့ ကိုယ်ရေးကိုယ်တာ အရှုပ်တော်ပုံကြောင့် အမေရိကန်ဘက်က အဆင့်မြင့်နည်းပညာ ကန့်သတ်ချက်တွေကို ပိုမိုတင်းကြပ်လာမှာကို စိုးရိမ်ပြီး ပြည်ပဒေတာစင်တာတွေက Nvidia စွမ်းအင်သုံး ကွန်ပြူတာစွမ်းရည်တွေကို ကြိုတင်ငှားရမ်းဖို့ ကြိုးစားနေတယ်လို့ ရိုက်တာသတင်းဌာနက ဖော်ပြပါတယ်။

လက်ရှိမှာ အမေရိကန်က အဆင့်မြင့် Nvidia Chip တွေ တရုတ်နိုင်ငံကို တိုက်ရိုက်တင်ပို့ခွင့် ပိတ်ပင်ထားပေမဲ့ ပြည်ပဒေတာစင်တာတွေ ကတဆင့် Nvidia Chip စွမ်းရည်တွေကို အသုံးပြုခွင့် ရှိနေဆဲဖြစ်ပါတယ်။

ဒါပေမဲ့ အဲဒီလို Cloud စနစ်ကတဆင့် အသုံးပြုတာကိုပါ ထိန်းချုပ်နိုင်မယ့် RASA ဥပဒေကြမ်း အမေရိကန်အထက်လွှတ်တော်မှာ ဆက်လက်အတည်ပြုလာနိုင်တာကြောင့် တရုတ်နည်းပညာကုမ္ပဏီတွေအနေနဲ့ ကြိုတင်ပြင်ဆင်နေကြတာလည်း ဖြစ်ပါတယ်။

ဒါ့အပြင် အမေရိကန်ရဲ့ ကန့်သတ်ချက်တွေ ပိုတင်းကျပ်လာမှာကို စိုးရိမ်ပြီး တရုတ်နိုင်ငံရဲ့ မှောင်ခိုဈေးကွက်မှာလည်း တင်ပို့ခွင့်ကန့်သတ်ထားတဲ့ Nvidia AI Chip တွေ ဝယ်လိုအား မြင့်တက်လာသလို ကုန်သည်တွေနဲ့ ကြားခံပွဲစားတွေကပါ Nvidia AI Chip ကြိုတင်ဝယ်ယူ စုဆောင်းမှုတွေ မြင့်တက်လာတယ်လို့ ရိုက်တာသတင်းဌာနက ဖော်ပြပါတယ်။

ပြီးခဲ့တဲ့လကလည်း တရုတ်စစ်တပ်နဲ့ ဆက်နွှယ်မှုရှိတဲ့ တရုတ်တက္ကသိုလ်တခုဟာ အမေရိကန်ရဲ့ ပို့ကုန်ကန့်သတ်စာရင်းထဲ ပါဝင်နေပေမယ့် Nvidia ရဲ့ အစွမ်းထက် H200 AI Chip တွေကို ဝယ်ယူသွားခဲ့တယ်လို့ ဝယ်ယူမှုမှတ်တမ်းတွေကို ကိုးကားပြီး ရိုက်တာသတင်းဌာနက ဖော်ပြပါတယ်။

ဒါ့အပြင် Nvidia Chip တွေပါဝင်တဲ့ ဆာဗာတွေကို အရှေ့တောင်အာရှအခြေစိုက် ကုမ္ပဏီတခု ကတဆင့် တရုတ်နိုင်ငံဆီ တရားမဝင်လွှဲပြောင်းခဲ့တယ်ဆိုတဲ့ စွပ်စွဲချက်နဲ့ Super Micro Computer ကုမ္ပဏီ ပူးတွဲတည်ထောင်သူ ယီရှန် ဝေါလီ လျော် အပါအဝင် သုံးဦးကိုလည်း အမေရိကန်အစိုးရရှေ့နေတွေက တရားစွဲဆိုထားပါတယ်။

အဆိုပါကုမ္ပဏီဟာ ၂၀၂၄ ခုနှစ်ကနေ ၂၀၂၅ ခုနှစ်အတွင်း Super Micro ဆီကနေ အမေရိကန်ဒေါ်လာ ၂ ဒသမ ၅ ဘီလျံခန့် တန်ဖိုးရှိတဲ့ ဆာဗာတွေ ဝယ်ယူခဲ့ပြီး အဲဒီထဲက အများအပြားကို တရုတ်နိုင်ငံဆီ လွှဲပြောင်းပေးခဲ့တယ်လို့ ဆိုပါတယ်။

Ref & Photo: Reuters

မြို့တော် News Channel