မုန်တိုင်းငယ်အရှိန်ကြောင့် မြန်မာနိုင်ငံတောင်ပိုင်းမှာ မိုးဆက်ကြီးနိုင်တယ်လို့ဆို

မုန်တိုင်းငယ်အရှိန်ကြောင့် မြန်မာနိုင်ငံတောင်ပိုင်းမှာ မိုးဆက်ကြီးနိုင်တယ်လို့ဆို

စက်တင်ဘာ ၂၄

ICON Model ရဲ့ ခန့်မှန်းသုံးသပ်အရ စက်တင်ဘာလ ၂၆ ရက်မှ ၂၈ ရက်အတွင်း တနင်္သာရီတိုင်း၊ ထားဝယ်မြို့နယ်နှင့် အနီးဝန်းကျင်မှာ မိုးအလွန်များနိုင်တယ်လို့ ခန့်မှန်းသုံးသပ်ထားပြီး လာမယ့် ၂၄ နာရီအတွင်း မိုးရေချိန် ၇၀ မီလီမီတာ မှ ၁၂၅ မီလီမီတာအထိ၊ နေရာကွက်ပြီး ၁၅၀ မီလီမီတာနီးပါးအထိ မိုးကြီးနိုင်တယ်လို့ မိုးလေဝသ ပညာရှင် ဦးဝင်းနိုင်က ခန့်မှန်းသုံးသပ်ထားပါတယ်။

အိန္ဒိယမိုးလေဝသဌာန (IMD) နှင့် ထုတ်ပြန်ချက်အရ ဘင်္ဂလားပင်လယ်အော် အနောက်အလယ်ပိုင်းမှာ ဖြစ်ပေါ်ခဲ့တဲ့ အားကောင်းတဲ့ မုန်တိုင်းငယ်ဟာ အိန္ဒိယနိုင်ငံ အန်ဒရာပရာဒေ့ရှ်မြောက်ပိုင်း ကမ်းရိုးတန်းသို့ ဖြတ်ကျော်ဝင်ရောက်ခဲ့ပြီး ကုန်းတွင်းပိုင်းမှာ ဆက်လက် တည်ရှိနေတယ်လို့ ဆိုပါတယ်။

မုန်တိုင်းငယ်ဟာ အိန္ဒိယကုန်းတွင်းပိုင်းသို့ ဝင်ရောက်သွားပေမယ့် ဘင်္ဂလားပင်လယ်အော်နှင့် ကပ္ပလီပင်လယ်ပြင်အတွင်း အနောက်တောင် မုတ်သုံလေအား ဆက်လက်ကောင်းမွန်စေဖို့ ထိန်းပေးထားပြီး အထူးသဖြင့် ကပ္ပလီပင်လယ်ပြင်နှင့် ထိုင်းနိုင်ငံဘက်မှ တိုးဝင်လာတဲ့ မုတ်သုံတိမ်တိုက်တွေဟာ မြန်မာနိုင်ငံ တနင်္သာရီတိုင်း၊ မွန်ပြည်နယ်၊ ကရင်ပြည်နယ်၊ ရန်ကုန်တိုင်း၊ ဧရာဝတီတိုင်းနှင့် ပဲခူးတိုင်းတို့ဘက်သို့ မိုးစိပ်စိပ်နှင့် မိုးသည်းထန်စွာ ဆက်လက် ရွာသွန်းစေမယ်လို့ ဆိုပါတယ်။

ICON Model ရဲ့ ထုတ်ပြန်ချက်အရ စက်တင်ဘာလ ၂၄ ရက်မှ ၃၀ ရက်အထိ ၇ ရက်အတွင်း မုတ်သုံလေ တိုက်ရိုက်ကျရောက်ရာ မြန်မာနိုင်ငံတောင်ပိုင်းနှင့် မြစ်ဝကျွန်းပေါ်ဒေသတွေဖြစ်တဲ့ ကရင်ပြည်နယ်၊ မွန်ပြည်နယ်၊ တနင်္သာရီတိုင်းတို့မှာ စုစုပေါင်း မိုးရေချိန် ၁၇၀ မီလီမီတာမှ ၂၉၁ မီလီမီတာအထက်အထိ ရရှိနိုင်တယ်လို့ ဆိုပါတယ်။

ကရင်ပြည်နယ်နှင့် မွန်ပြည်နယ် တောင်တန်းဒေသတွေမှာ လျှပ်တစ်ပြက် တောင်ကျရေ ကျတာနှင့် မြေပြိုတာတွေ သတိပြုရမှာဖြစ်ပြီး ဧရာဝတီတိုင်း မြေနိမ့်ပိုင်းဒေသတွေနှင့် လေးမျက်နှာ အပါအဝင် ငဝန်မြစ်ဝှမ်း ဒေသတွေမှာ မိုးရွာသွန်းမှုနှင့် ပင်လယ်ဒီရေ ပိတ်ဆို့မှုတွေကြောင့် ရေကြီးရေဝပ်မှု အခြေအနေဆက်လက် တည်ရှိနေမယ်လို့ ဆိုပါတယ်။

ဧရာဝတီတိုင်းမှာ မိုးသည်ထန်စွာရွာသွန်းနိုင်ပြီး မိုးရေချိန် ၁၀၄ မီလီမီတာမှ ၂၂၁ မီလီမီတာ၊ ရန်ကုန်တိုင်းမှာ ၁၃၂ မီလီမီတာမှ ၁၇၀ မီလီမီတာအထိ ရရှိနိုင်တယ်လို့ ဆိုပါတယ်။

ပဲခူးတိုင်း (တောင်ပိုင်း/အရှေ့ပိုင်း) နှင့် ရှမ်းပြည်နယ် (တောင်ပိုင်း/အရှေ့ပိုင်း) တို့မှာ မိုးရေချိန် ၁၀၀ မီလီမီတာ မှ ၁၈၀ မီလီမီတာ အထိ ရရှိနိုင်တာကြောင့် ပဲခူးမြစ်နှင့် စစ်တောင်းမြစ်ကြောင်းတွေအတွင်း ရေမျက်နှာပြင်တွေ မြင့်တက်လာနိုင်ကာ စိုးရိမ်ရေမှတ်အနီး ရောက်ရှိနိုင်တာကြောင့် သတိထား စောင့်ကြည့်ရပါမယ်လို့ ဆိုပါတယ်။

ရှမ်းတောင်နှင့် ရှမ်းအရှေ့တို့မှာ တောင်ကျချောင်းရေ ရုတ်တရက် တက်လာနိုင်တယ်လို့ ဆိုပါတယ်။

စစ်ကိုင်းတိုင်း(အထက်ပိုင်း)၊ ကချင်ပြည်နယ်၊ ချင်းပြည်နယ်နှင့် ရခိုင်ပြည်နယ်တို့မှာ စုစုပေါင်း မိုးရေချိန် ၆၀ မီလီမီတာ မှ ၁၂၆ မီလီမီတာအထိ ရရှိနိုင်ပြီး ဧရာဝတီမြစ်နှင့် ချင်းတွင်းမြစ် ရေမျက်နှာပြင်တွေ အနည်းငယ် မြင့်တက်လာနိုင်တယ်လို့ဆိုပါတယ်။

မန္တလေးတိုင်း၊ မကွေးတိုင်းနှင့် စစ်ကိုင်းတိုင်း(အောက်ပိုင်း)တို့မှာ ရခိုင်ရိုးမ ကာဆီးထားတဲ့အတွက် ၇ ရက်တာ မိုးရေချိန် ၅၀ မီလီမီတာအောက်သာ ရရှိမှာဖြစ်ပြီး မိုးပါးမယ်လို့ မိုးလေဝသ ပညာရှင် ဦးဝင်းနိုင်က ခန့်မှန်းသုံးသပ်ထားပါတယ်။

မြို့တော် News Channel