ရန်ကုန်မြို့မှာ ၂ ရက်အတွင်း လူငယ် ၇ ဦးကို ညအချိန် အိမ်စီးကားတွေနဲ့ ပေါ်တာဆွဲဖမ်းဆီးသွား

ရန်ကုန်မြို့မှာ ၂ ရက်အတွင်း လူငယ် ၇ ဦးကို ညအချိန် အိမ်စီးကားတွေနဲ့ ပေါ်တာဆွဲဖမ်းဆီးသွား

အောက်တိုဘာ ၈

ရန်ကုန်မြို့ပေါ်မှာ ညအချိန် လမ်းသွားလမ်းလာ လူငယ်တွေကို အိမ်စီးကားတွေနဲ့ အလစ်အငိုက် လာရောက်ဖမ်းဆီးတာတွေအပြင် နေအိမ်ထဲအထိပါ ဝင်ရောက်ဖမ်းဆီးတာတွေ ဆက်တိုက် ဖြစ်ပွားနေတယ်လို့ Rangoon Scout Network ရဲ့ သတင်းထုတ်ပြန်ချက်တွေအရ သိရပါတယ်။

အောက်တိုဘာလ ၇ ရက် ည ၈ နာရီခွဲဝန်းကျင်က လှိုင်မြို့နယ်၊ ၁၆ ရပ်ကွက်၊ အနောက်ပေ ၅၀ လမ်းနဲ့ မာလာမြိုင် ၆ လမ်းဆုံအနီးမှာ ရပ်နေတဲ့ လူငယ် ၃ ဦးကို ရဲနဲ့ အနက်ရောင် Honda Fit ကားတစီးနဲ့ ရောက်လာပြီး ကားပေါ် အတင်းဆွဲတင်ပြီးနောက် ပါရမီလမ်းဘက်ကို အရှိန်ပြင်းပြင်းနဲ့ မောင်းနှင်ထွက်ပြေးသွားခဲ့တယ်လို့ သိရပါတယ်။

အလားတူ အောက်တိုဘာလ ၆ ရက် ည ၁၁ နာရီခွဲလောက်မှာလည်း မြောက်ဒဂုံမြို့နယ်၊ ဘုရင့်နောင်လမ်းပေါ်က တပင်ရွှေထီးလမ်းဆုံအနီး လမ်းလျှောက်နေတဲ့ အသက် ၃၀ ဝန်းကျင် အမျိုးသား ၃ ဦးကို စစ်ကားတွေအပြင် Alphard အဖြူရောင်တစ်စီးနဲ့ ရောက်ရှိလာတဲ့ အာဏာသိမ်းစစ်တပ် တပ်ဖွဲ့ဝင်တွေက ဝိုင်းဝန်းရိုက်နှက်ဖမ်းဆီးပြီး ကားပေါ်ဆွဲတင် ခေါ်ဆောင်သွားတယ်လို့ သိရပါတယ်။

ဒီဖြစ်စဉ်မတိုင်ခင် အောက်တိုဘာလ ၆ ရက် ည ၁၀ နာရီဝန်းကျင်မှာလည်း လှိုင်မြို့နယ်၊ ကမာရွတ်ဘူတာရုံအနီး ဘူတာရုံလမ်း ကားမှတ်တိုင်နားမှာ နေထိုင်တဲ့ အသက် ၃၀ အရွယ် အမျိုးသားတဦးကို စစ်မှုထမ်းအတွက်ဆိုပြီး နေအိမ်ထဲအထိ ဝင်ရောက်ဖမ်းဆီးသွားခဲ့တယ်လို့ သိရပါတယ်။

လက်ရှိ ရန်ကုန်မြို့မှာ အာဏာသိမ်းစစ်တပ်နဲ့ လက်အောက်ခံအဖွဲ့တွေက စစ်မှုထမ်း အပတ်စဉ်သစ်တွေအတွက် လူအင်အား အသည်းအသန် လိုအပ်နေတာကြောင့် လူငယ်တွေကို ပေါ်တာဆွဲ ဖမ်းဆီးတာတွေကို ပိုပြီး ပြောင်ပြောင်တင်းတင်း လုပ်ဆောင်လာတာ တွေ့ရပါတယ်။

အထူးသဖြင့် အိမ်စီးကားတွေကို အသုံးပြုကာ အရပ်ဝတ်တွေနဲ့ပါ လှည့်လည်စောင့်ဆိုင်းနေတဲ့အပြင် လမ်းကြိုလမ်းကြားတွေမှာ လူငယ်တွေကို အလစ်အငိုက် စောင့်ဖမ်းတာနဲ့ နေအိမ်တွေထဲအထိ ဧည့်စာရင်းစစ်သလိုနဲ့ ဝင်ရောက်ဖမ်းဆီးတဲ့ ပုံစံတွေကို ပိုမို အသုံးပြုလာနေပါတယ်။

မြို့တော် News Channel