Junta arrests 4 students for using TikTok at revolutionary forces' checkpoint

မွန်ပြည်နယ် ကျိုက်ထိုမြို့နယ်မှာ အခြေခံပညာကျောင်းသား ၄ ဦး တော်လှန်ရေးတပ်ဖွဲ့ရဲ့ စစ်ဆေးရေးဂိတ်မှာ TikTok ဆော့ကစားခဲ့ကြတာကြောင့် အာဏာသိမ်းစစ်တပ်က ဖမ်ဆီးလိုက်တယ်လို့ သိရပါတယ်။

ဩဂုတ်လ ၂၃ ရက်နေ့ နေ့လယ်ပိုင်းနဲ့ ၂၄ ရက်နေ့တို့က ကျိုက်ထိုမြို့နယ်၊ သိမ်ဇရပ်မြို့ အထက်တန်းကျောင်းမှာ ပညာသင်ကြားနေတဲ့ ကျောင်းသား ၄ ဦးကို သိမ်ဇရပ် အမှတ်(၄)နဲ့ အမှတ်(၆) ရပ်ကွက်က သူတို့နေထိုင်ရာ နေအိမ်တွေမှာ ဝင်ရောက်ဖမ်းဆီးသွားခဲ့တာလို့ သိရပါတယ်။

"ပြီးခဲ့တဲ့ရက်က သူတို့ကျောင်းပိတ်လို့ ဝင်းကံပြည်သူ့ကာကွယ်ရေး စစ်ဆေးရေးဂိတ်မှာ TikTok ဆော့ပြီး လိုင်းပေါ်တင်တဲ့ကိစ္စ ပြန့်သွားလို့ အာဏာသိမ်းစစ်တပ်က ဝင်ဖမ်းလိုက်တာ" လို့ ဒေသခံတဦးက ပြောပါတယ်။

ဖမ်းဆီးခံခဲ့ရတဲ့ ကျောင်းသားတွေဟာ အသက် ၁၃ နှစ်ကနေ ၁၇ နှစ်ကြားရှိတဲ့ ကလေးငယ်တွေဖြစ်ပြီး Grade 7 ကနေ Grade 11 ထိ ကျောင်းသားတွေ ဖြစ်တယ်လို့လည်း သိရပါတယ်။

ဖမ်းဆီးခံရတဲ့ ကျောင်းသားတွေထဲမှာ သိမ်ဇရပ်အခြေစိုက် အမှတ်(၂၀၇) ခြေမြန်တပ်ရင်းက အရာခံဗိုလ်တဦးရဲ့ သားဖြစ်သူလည်း ပါတယ်လို့ သိရပါတယ်။

မွန်ပြည်နယ်မှာ ရေဘီးလူး Page ကို Like ပေးသူ Comment ပေးသူပါ မကျန် ဖမ်းဆီးနေပြီး လတ်တလော ဖမ်းဆီးခံရတဲ့ ကျောင်းသားတွေ ပြန်လည်လွတ်မြောက်ဖို့ မိသားစုဘက်က သွားရောက်ညှိနှိုင်းပေမယ့် ပြန်လွှတ်မပေးသေးဘူးလို့ သိရပါတယ်။