ငါးသိုင်းချောင်း-အိုင်သပြု လမ်းပေါ်မှာ လှေမှောက်လို့ ရေဘေးလာလှူတဲ့ အလှုရှင် ၁ ဦး သေဆုံးကာ ၂ ဦး ပျောက်ဆုံးနေ

ဧရာဝတီတိုင်း၊ ငါးသိုင်းချောင်း-အိုင်သပြု လမ်းပေါ်မှာ ဒီနေ့မနက်ပိုင်းက ဒေသခံ ၃ ဦး စီးနင်းလိုက်ပါလာတဲ့ လှေတစီး တိမ်းမှောက်ခဲ့ပြီး ရုပ်အလောင်းတခုသာ ပြန်ရသေးတယ်လို့ သိရပါတယ်။

ဩဂုတ်လ ၃၁ ရက်နေ့ ဒီကနေ့မနက်ပိုင်းက တိမ်းမှောက်ခဲ့တာဖြစ်ပြီး လှေပေါ်ပါသူ ၃ ဦးထဲက ၁ ဦးရဲ့ ရုပ်အလောင်းကိုသာ ပြန်ရပြီး ကျန် ၂ ဦး ပျောက်ဆုံးနေတယ်လို့ သိရပါတယ်။

"ကနဦးသိရသလောက်တော့ သေတာက ရေဘေးသင့်ပြည်သူတွေကို လာလှူတဲ့ အလှုရှင် ဖြစ်နေတယ်။ ကြပ်ကွင်းရွာသား ၂ ယောက်ပျောက်နေတယ်" လို့ ဒေသခံတဦးက ပြောပါတယ်။

ငါးသိုင်းချောင်း-အိုင်သပြု လမ်းပေါ်ဟာ ရေနစ်မြုပ်နေပြီး စက်လှေနဲ့သာ သွားလာနေရကာ တချို့နေရာတွေမှာ ရေစီးကြမ်းလို့ ကယ်ဆယ်ရေးစက်လှေတွေပင် သွားလာရခက်ခဲတဲ့ အနေအထားမှာ ရှိတယ်လို့ သိရပါတယ်။

"Life Jack တွေ ဝတ်သွားကြပါ၊ ဖြစ်ရင် မလွယ်ဘူး။ နယ်ခံတွေတောင် အသက်အန္တရာယ်ရှိတယ်။ ရေစီးကလည်း မမှန်ဘူး၊ အရမ်းသန်တယ်။ အခုပျောက်နေတဲ့ ၂ ယောက်ကို ရှာနေတုန်းပဲ။ တယောက်ရဲ့ အလောင်းပဲ ရသေးတယ်" လို့ ဒေသခံတဦးက ထပ်မံပြောဆိုပါတယ်။

ပျောက်ဆုံးနေသူတွေဟာ ကြပ်ကွင်းရွာကလို့ သိရပြီး ဩဂုတ်လ၂၇ ရက်နေ့ ညကလည်း ငါးသိုင်းချောင်းမြို့၊ ရွာသစ်ကုန်းတံတားအနီးမှာ ငါးဖမ်းထွက်လာတဲ့ လှေတစီး တိမ်းမှောက်ပြီး လှေပေါ်မှာပါတဲ့ အမျိုးသား ၂ ဦးထဲက ၁ ဦး‌ ရေနစ်ပျောက်ဆုံးခဲ့ပြီးနောက် ၂ ရက်အကြာမှာ ရုပ်အလောင်း ရရှိခဲ့ပါသေးတယ်။

လက်ရှိအချိန်ထိ ဧရာဝတီတိုင်းမှာ ရေနစ်သေဆုံးသူ ၁၄ ဦးထက်မနည်း ရှိနေပြီလို့လည်း သိရပါတယ်။