မွန်တရားရုံးဝန်ထမ်းကို ရဲ၂ဦး အရက်တိုက်ရောင်းစား ဖမ်းဆီးစစ်ဆေး

မွန်ပြည်နယ်တရားလွှတ်တော်ရုံးက ခြေထောက်တဖက်မသန်တဲ့ သန့်ရှင်းရေးဝန်ထမ်းကို ရဲ ၂ ဦးက အရက်တိုက်ပြီး ငွေ ၅ သိန်းနဲ့ ရောင်းစား

၂၀၂၆ စက်တင်ဘာ ၁၁ Myo Taw

စက်တင်ဘာ ၁၁

မွန်ပြည်နယ် တရားလွှတ်တော်ရုံးက သန့်ရှင်းရေးလုပ်သား ၁ ဦးကို ရောင်းစားခဲ့တဲ့ ရဲတပ်ဖွဲ့ဝင် ၂ ဦးကို အာဏာသိမ်းအစိုးရက ဖမ်းဆီးစစ်ဆေးနေတယ်လို့ သိရပါတယ်။

စက်တင်ဘာလ ၈ ရက်နေ့ ညပိုင်းက တရားလွှတ်တော်ရုံးက သန့်ရှင်းရေးဝန်ထမ်းတဦး အလုပ်ကအပြန် သံလွင်တံတားမှာ တာဝန်ကျတဲ့ ရဲတပ်ဖွဲ့ဝင် ၂ ဦးနဲ့ အရက်အတူတူသောက်နေရာက ပျောက်ဆုံးသွားခဲ့တာလို့ ဆိုပါတယ်။

"၈ ရက်နေ့က ပျောက်သွားတာ။ မွန်ပြည်နယ်တရားရုံးက လူပျောက်တိုင်တာ။ သူနဲ့ နောက်ဆုံးဖုန်းရတာ ရဲတွေနဲ့ အရက်သောက်တယ်ဆိုတဲ့ အချက်နဲ့ လိုက်တာ။ ပျောက်သွားတဲ့သူကို ၁၀ ရက်နေ့မှာ ရဲစခန်းက တရားရုံးကို လာပို့တယ်။ ရဲ ၂ ယောက်က အရက်တိုက်ပြီး ရောင်းစားသွားတာလို့ ပြောတယ်၊ သူက ခြေတဖက်မသန်ဘူး" လို့ တရားရုံနဲ့ နီးစပ်သူတဦးက ပြောပါတယ်။

စက်တင်ဘာလ ၁၀ ရက်နေ့ညမှာ မွန်ပြည်နယ်ရဲစခန်းက ပျောက်ဆုံးနေတဲ့ အမျိုးသားကို လာရောက် ပို့ဆောင်ခဲ့တယ်လို့ သိရပြီး အတူတူအရက်သောက်ခဲ့တဲ့ ရဲတပ်သား ၂ ဦးက မုံဒုံဘက်မှာ ငွေကျပ် ၅ သိန်းနဲ့ ရောင်းစားခဲ့တာလို့ သိရပါတယ်။

မွန်ပြည်နယ် တရားလွှတ်‌တော်ရုံးက ရဲစခန်းကို တိုက်ရိုက်တိုင်ကြားလို့ အခုလို ပြန်ပို့တာလို့ သိရပြီး ရောင်းစားခဲ့တဲ့ ရဲတပ်ဖွဲ့ဝင် ၂ ဦးကိုလည်း ဖမ်းဆီးအရေးယူထားတယ်လို့ သိရပါတယ်။

မြို့တော် News Channel