အသက်မပြည့်သေးတဲ့ ညီမဝမ်းကွဲကို လိင်ပိုင်းဆိုင်ရာပြုကျင့်ပြီး သတ်ဖြတ်အလောင်းဖျောက်ခဲ့သူကို သေဒဏ်ပေး

အသက်မပြည့်သေးတဲ့ ညီမဝမ်းကွဲကို လိင်ပိုင်းဆိုင်ရာပြုကျင့်ပြီး သတ်ဖြတ်အလောင်းဖျောက်ခဲ့သူကို သေဒဏ်ပေး

ဩဂုတ် ၃၁

အသက်မပြည့်သေးတဲ့ ညီမဝမ်းကွဲ တော်စပ်သူ အမျိုးသမီးငယ်တစ်ဦးကို လိင်ပိုင်းဆိုင်ရာပြုကျင့်ပြီး သတ်ဖြတ်ခဲ့သူကို သေဒဏ်ပေးလိုက်တယ်လို့ ရှမ်းပြည်တိုးတက်ရေးပါတီ-SSPP/SSA က ဒီကနေ့မှာ သတင်းထုတ်ပြန်ထားပါတယ်။

ရှမ်းပြည်နယ်မြောက်ပိုင်း သီပေါမြို့နယ်၊ စံဖိတ်ကျေးရွာအုပ်စု၊ လွယ်ကျိုင်းကျေးရွာနေ စိုင်းဆာစံ ဆိုသူဟာ အသက် ၁၄ နှစ်အရွယ်ရှိ ညီမဝမ်းကွဲတော်စပ်သူကို လိင်ပိုင်းဆိုင်ရာ ပြုကျင့်ပြီး သတ်ဖြတ်ကာ အလောင်းဖျောက်ခဲ့တာ ဖြစ်တယ်လို့ ဆိုပါတယ်။

ပြီးခဲ့တဲ့ ဇွန်လ ၁၄ ရက်နေ့က စိုင်းဆာစံ ဟာ တရွာတည်းနေ ညီမဝမ်းကွဲ တော်စပ်သူ အသက် ၁၄ နှစ်အရွယ်ရှိ နန်းစံဟွမ် ကို အလုပ်ရှာပေးမယ်လို့ အကြောင်းပြကာ ခေါ်ဆောင်သွားခဲ့ပြီး သီပေါမြို့နယ်၊ ဘော်ကြိုကျေးရွာအုပ်စု၊ နမ့်ဟူးနွဲ့ကျေးရွာအနီးရှိ ဌက်ပျောစိုက်ခင်း တနေရာမှာ လိင်ပိုင်းဆိုင်ရာ ပြုကျင့်ပြီး သတ်ဖြတ်ခဲ့တာ ဖြစ်တယ်လို့ သိရပါတယ်။

သတ်ဖြတ်ပြီးနောက် အလောင်းကို ငှက်ပျောပင် ငှက်ပျောရွက်တွေနှင့် ဖုံးအုပ်ကာ အလောင်းကို ဖျောက်ထားခဲ့တယ်လို့ သိရပါတယ်။

မိဘတွေက ဇွန်လ ၂၅ ရက်နေ့မှာ ရှမ်းပြည်တိုးတက်ရေးပါတီ-SSPP/SSA ထံသို့ လာရောက်တိုင်ကြားခဲ့တာကြောင့် တာဝန်ရှိသူတွေက ချက်ချင်းစုံစမ်းဖော်ထုတ်ခဲ့ရာ တိုင်ကြားတဲ့ နေ့မှာပင် ပြစ်မှုကျူးလွန်သူ စိုင်းဆာစံကို ဖမ်းဆီးရမိခဲ့တယ်လို့ ဆိုပါတယ်။

ပြစ်မှုကျူးလွန်သူ တရားခံ စိုင်းဆာစံ ကို SSPP/SSA ဗဟိုဌာနချုပ် အထက်တရားရုံးက စစ်ဆေးစီရင်ပြီးနောက် ဩဂုတ်လ ၃၀ ရက် မနေ့က နေ့လယ် ၂ နာရီမှာ သေဒဏ်စီရင် လိုက်တယ်လို့ သိရပါတယ်။

မြို့တော် News Channe