ဧရာဝတီမှာ မိုးစပါးခင်းတွေ ရေနစ်မြုပ်ပျက်စီးမှုနဲ့ အတူ ဆန်စပါးဈေး ထပ်တက်၊ ဧရာဝတီပေါ်ဆန်း တင်း ၁၀၀ ကို ၅၂ သိန်းအထိ ရှိလာ

ဧရာဝတီတိုင်း ဆန်စပါးဈေးကွက်မှာ ဩဂုတ်လကုန်ပိုင်းအတွင်း ဆန်တစ်အိတ်ကို ကျပ် ၅,၀၀၀ ကနေ ၁၅,၀၀၀ အထိနဲ့ စပါးတင်း ၁၀၀ ကို ကျပ် ၁ သိန်းကနေ ၅ သိန်းအထိ ဈေးမြင့်တက်လာတယ်လို့ ဆန်စပါးကုန်သည်တွေထံက သိရပါတယ်။

ဆန်စပါးဈေး မြင့်တက်လာတာဟာ မိုးစပါးခင်းတွေ ရေနစ်မြုပ်ပျက်စီးမှုအပြင် မြေပြင်မှာ စပါးလက်ကျန်နည်းလာတာနဲ့ ရန်ကုန်က ဝယ်လက်တွေရဲ့ ဝယ်လိုအား မြင့်တက်လာတာတွေကြောင့် ဖြစ်တယ်လို့ ဆိုပါတယ်။

ပုံမှန်အားဖြင့် ရန်ကုန်က ဝယ်လက်တွေဟာ စပါးကို အောက်တိုဘာလလောက်မှ စတင် ဝယ်ယူသိုလှောင်လေ့ရှိပေမယ့် ဒီနှစ်မှာတော့ ရေကြီးနိုင်တဲ့ အခြေအနေတွေကြောင့် ဩဂုတ်လအတွင်းကတည်းက ကြိုတင်ဝယ်ယူမှုတွေ ပြုလုပ်လာတယ်လို့ သိရပါတယ်။

ဩဂုတ် ၂၆ ရက်နေ့ ဈေးနှုန်းတွေအရ ဧရာဝတီပေါ်ဆန်း (ပုသိမ်) ဆန်တစ်အိတ်ကို ကျပ် ၁၇၅,၀၀၀ ကနေ ၁၈၀,၀၀၀ အထိ ရှိပြီး ဧရာဝတီပေါ်ဆန်းစပါး တင်း ၁၀၀ ကို ကျပ် ၅၂ သိန်းအထိ ရှိပါတယ်။ ရက် ၉၀ စပါးက တင်း ၁၀၀ ကို ကျပ် ၃၀ သိန်း၊ GW11 စပါးက ကျပ် ၂၅ သိန်းနဲ့ သုခစပါးက ကျပ် ၂၇ သိန်းအထိ ဈေးပေါက်နေတယ်လို့ သိရပါတယ်။

ဩဂုတ် ၁၃ ရက် ဈေးနှုန်းတွေနဲ့ နှိုင်းယှဉ်ရင် ဆန်စျေးက တစ်အိတ်ကို ကျပ် ၅,၀၀၀ ကနေ ၁၅,၀၀၀ အထိနဲ့ စပါးဈေးက တင်း ၁၀၀ ကို ကျပ် ၁ သိန်းကနေ ၅ သိန်းအထိ မြင့်တက်လာတာတယ်လို့ ဆိုပါတယ်။

လက်ရှိမှာ ဧရာဝတီတိုင်းအတွင်း လေးမျက်နှာ၊ ငါးသိုင်းချောင်း၊ ကျုံပျော်၊ ရေကြည်၊ ကျောင်းကုန်းနဲ့ ဟင်္သာမြို့နယ်တွေမှာ မိုးစပါးစိုက်ခင်းတွေ ရေနစ်မြုပ်ပျက်စီးမှုတွေ ရှိနေတယ်လို့ သိရပါတယ်။