ကိုမာဝင်နေပြီလို့ ကောလာဟလထွက်လာပြီးနောက် သမီးဖြစ်သူ ကင်ဂျူအဲ နဲ့အတူ ကင်ဂျုံအန်း လူမြင်ကွင်းပြန်ထွက်လာ

ကိုမာဝင်နေပြီလို့ ကောလာဟလထွက်လာပြီးနောက် သမီးဖြစ်သူ ကင်ဂျူအဲ နဲ့အတူ ကင်ဂျုံအန်း လူမြင်ကွင်းပြန်ထွက်လာ

အောက်တိုဘာ ၂၀

မြောက်ကိုရီးယားခေါင်းဆောင် ကင်ဂျုံအန်းဟာ ဦးနှောက်သွေးယိုစီးပြီး ကိုမာဝင်ကာ သတိလစ်မေ့မြောနေတယ်ဆိုတဲ့ ကောလာဟလတွေ ထွက်ပေါ်လာပြီးနောက် ကင်ဂျုံအန်းဟာ မြောက်ကိုရီးယားနိုင်ငံတွင်းက အထည်အလိပ်နဲ့ ဖိနပ်ထုတ်ကုန်ပြပွဲတခုမှာ သမီးဖြစ်သူနဲ့အတူ လူလုံးထွက်ပြလာခဲ့ပါတယ်။

ဗြိတိန်အခြေစိုက် The Sun အပါအဝင် အနောက်တိုင်း သတင်းစာတချို့ရဲ့ ဖော်ပြချက်တွေမှာတော့ ကင်ဂျုံအန်းဟာ ဦးနှောက်သွေးကြောပြတ်ပြီး သတိလစ်သွားခဲ့တာကြောင့် အရေးပေါ် ဆေးကုသမှု ခံယူဖို့ တရုတ်နိုင်ငံ ပေကျင်းမြို့ကို အလျင်အမြန် ပို့ဆောင်ထားရတယ်လို့ ကောလာဟလအနေနဲ့ သတင်းတွေ ရေးသားဖော်ပြခဲ့ကြတာ ဖြစ်ပါတယ်။

ဒါပေမဲ့ အောက်တိုဘာ ၂၀ ရက် ဒီကနေ့မနက်ပိုင်းမှာ မြောက်ကိုရီးယားနိုင်ငံပိုင် သတင်းအေဂျင်စီ KCNA ကနေ ကင်ဂျုံအန်းရဲ့ သတင်းနဲ့ ဓာတ်ပုံတွေကို ထုတ်ပြန်လိုက်ပါတယ်။

အဆိုပါသတင်းမှာတော့ ကင်ဂျုံအန်းဟာ အောက်တိုဘာ ၁၉ ရက်နေ့က မြောက်ကိုရီးယားနိုင်ငံမှာ ကျင်းပတဲ့ "အမျိုးသားအဆင့် အဝတ်အထည်နဲ့ ဖိနပ်ထုတ်ကုန်ပြပွဲ" ကို သမီးဖြစ်သူ ကင်ဂျူအဲ နဲ့အတူ သွားရောက်လေ့လာခဲ့တယ်လို့ ဖော်ပြထားပါတယ်။

KCNA ရဲ့ ဓာတ်ပုံမှတ်တမ်းတွေအရ ကင်ဂျုံအန်းဟာ ကိုမာဝင်နေတဲ့ လက္ခဏာမျိုး လုံးဝမတွေ့ရဘဲ ပုံမှန်အတိုင်း လမ်းလျှောက်ကာ ပြခန်းတွင်းက အင်္ကျီတွေကို လက်နဲ့ ကိုင်တွယ်စစ်ဆေးနေတာကို တွေ့ရပါတယ်။ ဒါ့အပြင် အနားမှာလည်း သမီးဖြစ်သူနဲ့ တာဝန်ရှိသူတွေ ဝန်းရံလျက် စကားပြောဆိုနေတာ တွေ့ရပါတယ်။

မြောက်ကိုရီးယား ခေါင်းဆောင်တွေရဲ့ ကျန်းမာရေးဟာ နိုင်ငံတော်လျှို့ဝှက်ချက်ဖြစ်တာကြောင့် ပြင်ပကနေ သီးခြားအတည်ပြုဖို့ ခက်ခဲလေ့ရှိပြီး အခုလို သေဆုံးခါနီးဖြစ်နေပြီဆိုတဲ့ ကောလာဟလတွေဟာ အရင်ကလည်း ခဏခဏ ထွက်ပေါ်ခဲ့ဖူးပါတယ်။

မြို့တော် News Channel