မန္တလေးမှာ ဆိုင်ကယ်စီးလာသူတွေကို ဓားနဲ့ခုတ်ပြီး ဖုန်းနှင့် ဆိုင်ကယ်တွေ လုယက်မှု ၁၄ မှုခန့် ကျုးလွန်ထားသူတွေကို ဖမ်းဆီးရမိပြီလို့ဆို

မန္တလေးမှာ ဆိုင်ကယ်စီးလာသူတွေကို ဓားနဲ့ခုတ်ပြီး ဖုန်းနှင့် ဆိုင်ကယ်တွေ လုယက်မှု ၁၄ မှုခန့် ကျုးလွန်ထားသူတွေကို ဖမ်းဆီးရမိပြီလို့ဆို

နိုဝင်ဘာ ၁၀

မန္တလေးမြို့မှာ ဆိုင်ကယ်စီးလာသူတွေကို ဓားနဲ့ခုတ်ကာ ဖုန်းနှင့် ဆိုင်ကယ်တွေ လုယက်မှု ၁၄ မှုခန့် ကျုးလွန်ထားတဲ့ အဖွဲ့ကို နိုဝင်ဘာလ ၄ ရက်နေ့က ဖမ်းဆီးရမိခဲ့တယ်လို့ သိရပါတယ်။

အောက်တိုဘာလအတွင်းမှာ အမျိုးသား ၂ ဦးဟာ ဆိုင်ကယ်မောင်းနှင်လာစဉ် ရှမ်းကလေး ကျွန်းလမ်းဆုံရှိ Denko ဆီဆိုင်အနီး စစ်ကိုင်း-မန္တလေး ကမ်းနားလမ်းပေါ်သို့အရောက်မှာ ဆိုင်ကယ် ၃ စီးခန့်နဲ့ အမျိုးသား ၆ ဦးခန့်အဖွဲ့က ဆိုင်ကယ်ကို တားဆီးပြီး အသင့်ပါလာတဲ့ဓားနဲ့ ဝိုင်းဝန်းခုတ်ကာ ဆိုင်ကယ်နှင့် Redmi Note 13 ဖုန်းတစ်လုံးကို လုယက်ယူဆောင် ထွက်ပြေးသွားတဲ့ဖြစ်စဉ် ဖြစ်ပွားခဲ့တယ်လို့ သိရပါတယ်။

အလားတူ အောက်တိုဘာလအတွင်းမှာပဲ ကိုတိုးတက်ဦးနှင့် သူငယ်ချင်းနှစ်ဦးဟာ HONDA CLICK-125 ဆိုင်ကယ်စီးနင်းလာစဉ် ၂၂ လမ်း၊ လမ်း ၆၀ နှင့် ၆၂ လမ်းကြားအရောက်မှာ အမျိုးသား ၃ ဦးက ဆိုင်ကယ်နဲ့ ရောက်ရှိလာပြီး ဆိုင်ကယ်ကို ရပ်တန့်စေကာ ကိုတိုးတက်ဦးကို ဓားရှည်နဲ့ခုတ်ပြီး ဆိုင်ကယ်ကို ယူဆောင်မောင်းနှင်သွားတဲ့ ဖြစ်စဉ် ဖြစ်ပွားခဲ့တယ်လို့ သိရပါတယ်။

ဆက်လက်ပြီး မဟာအောင်မြေမြို့နယ်၊ ၆၃ လမ်းနှင့် ၄၃ လမ်း၊ မနော်ရမ္မံ ညဈေးအနီး လမ်းကြားမှာ အမျိုးသား ၁ ဦး ဆိုင်ကယ်လုယက်ခံရကြောင်း သတင်းရရှိတာကြောင့် လိုက်လံဝိုင်းဝန်းပိတ်ဆို့ရှာဖွေရာ ၁၂၀ လမ်းနှင့် ၆၂ လမ်းအရောက်မှာ Scoopy ဆိုင်ကယ်တစ်စီးနှင့်အတူ ညီနိုင် (၂၃ နှစ်) နှင့် ကျော်ခိုင်လင်း (၁၈ နှစ်) တို့ နှစ်ဦးကို ဖမ်းဆီးရမိခဲ့ပြီး စစ်ဆေးမှုအရ သန့်မင်းခန့်၊ အောင်မျိုးဦးနှင့် ဝေဖြိုးအောင်တို့ ၃ ဦးလည်း လုယက်မှုတွေမှာ ကျူးလွန်ခဲ့ကြောင်း ထွက်ဆိုခဲ့တာလို့ ဆိုပါတယ်။

ဒါ့အပြင် လုယက်ယူဆောင်ရာမှ ရရှိတဲ့ပစ္စည်းတွေကို လက်ခံဝယ်ယူသူ အေးအောင်ဝင်း (၃၅ နှစ်) ကို လည်း ဖမ်းဆီးနိုင်ခဲ့တယ်လို့ ဆိုပါတယ်။

၂၀၂၆ ခုနှစ် စက်တင်ဘာလထက် အောက်တိုဘာလအတွင်းမှာ ကျူးလွန်ခဲ့တဲ့ အမှုတွေ ပိုများတယ်လို့ သိရပြီး အမှုဖွင့်ထားတာဟာ ၇ မှု ခန့်သာရှိခဲ့ပေမဲ့ စစ်ဆေးမှုအရ လုယက်မှု ကျူးလွန်တဲ့ အမှုပေါင်း ၁၄ မှုခန့်ရှိကာ ကျုးလွန်ခဲ့တဲ့ တရားခံ ၅ ဦးနဲ့ ပစ္စည်းလက်ခံသူ အပါအဝင် စုစုပေါင်း ၆ ဦးကို ဖမ်းဆီးရမိပြီ ဖြစ်တယ်လို့ သိရပါတယ်။

မြို့တော် News Channel