ကျိုက်ထိုမြို့ ဈေးဝယ်အမျိုးသမီး ၂ ဦး သေနတ်ပြ လုယက်ခံရ၊ ရွှေ ၃ ကျပ်သား ပါသွား

ကျိုက်ထိုမြို့ကို ဈေးလာဝယ်တဲ့ အမျိုးသမီး ၂ ဦး သေနတ်ပြ လုယက်ခံရပြီး ရွှေ ၃ ကျပ်သား ပါသွားတယ်လို့ဆို

၂၀၂၆ အောက်တိုဘာ ၁၇ Myo Taw

ကျိုက်ထိုမြို့ကို ဈေးလာဝယ်တဲ့ အမျိုးသမီး ၂ ဦး သေနတ်ပြ လုယက်ခံရပြီး ရွှေ ၃ ကျပ်သား ပါသွားတယ်လို့ဆို

အောက်တိုဘာ ၁၇

မွန်ပြည်နယ်၊ ကျိုက်ထိုမြို့နယ်၊ ကော့ထင်းကျေးရွာနဲ့ ဘိုရားကြီးကျေးရွာကြားမှာ အမျိုးသမီး ၂ ဦး သေနတ်ပြ လုယက်ခံရတယ်လို့ သိရပါတယ်။

အောက်တိုဘာလ ၁၅ ရက်နေ့ နေ့လယ် ၁၂ နာရီဝန်းကျင်ခန့်က မလော့ချောင်ကျေးရွာက အသက် ၄၀ ဝန်းကျင် အမျိုးသမီး ၂ ဦးဟာ ဆိုင်ကယ်နဲ့ ကျိုက်ထိုမြို့ကို ဈေးလာဝယ်ချိန် အနောက်ကနေ ဆိုင်ကယ်နဲ့လိုက်လာတဲ့ အမျိုးသား ၂ ဦးက သေနတ်ပြ လုယက်ခဲ့တာလို့ သိရပါတယ်။

“ထွက်ပြေးဖို့လုပ်တော့ သေနတ်မိုးပေါ်ထောင်ပြီး ၂ ချက်ဖောက်တယ်တဲ့၊ ပြီးတော့ ရွှေတွေ ချွတ်ပေးလိုက်ရတာလို့ ပြောတယ်။ ကာလတန်ဖိုး သိန်း ၃၀၀ ကျော်လောက် ပါသွားတာ” လို့ ဒေသခံတဦးက ပြောပါတယ်။

အမျိုးသမီး ၂ ဦး သေနတ်ပြ လုယက်ခံရတာကြောင့် ခန္ဓာကိုယ်မှာ ဝတ်ဆင်ထားတဲ့ ရွှေ ၃ ကျပ်သား ပါသွားတယ်လို့ ဒေသခံတွေရဲ့ ပြောဆိုချက်အရသိရပြီး အောက်တိုဘာလ ၁၇ ရက် ဒီကနေ့ထိ တရားခံတွေကို ဖမ်းဆီးရမိခြင်း မရှိသေးဘူးလို့ သိရပါတယ်။

ကော့ထင်းနဲ့ ဘိုရားကြီးကျေးရွာလမ်းပိုင်းဟာ ကား၊ ဆိုင်ကယ်တွေ အမြဲတမ်းလိုလို သွားလာနေတဲ့ လမ်းပိုင်းဖြစ်ပြီး အခုလို သေနတ်ပြ လုယက်မှုတွေလည်း မကြာခဏ ကြုံရတယ်လို့ သိရပါတယ်။

မြို့တော် News Channel