မြစ်ကြီးနား ရွှေဆိုင် လုယက်မှု ၃ ဦးဖမ်းဆီး

မြစ်ကြီးနား ဈေး(၁)အနီး ရွှေပန်းတိမ်ဆိုင်တွင် အမျိုးသားနှင့် အမျိုးသမီးနှစ်ဦး လုယက်မှုကျူးလွန်၊ ၃ ဦး ဖမ်းဆီးထားဟုဆို

၂၀၂၆ အောက်တိုဘာ ၂ Myo Taw

အောက်တိုဘာ ၂

ကချင်ပြည်နယ်၊ မြစ်ကြီးနားမြို့၊ ဈေး(၁)အနီးရှိ ရွှေစည်တော် ရွှေပန်းတိမ်ဆိုင်တွင် ယနေ့ အောက်တိုဘာ ၂ ရက် နံနက် ၈ နာရီခွဲခန့်က အမျိုးသားတစ်ဦးနှင့် အမျိုးသမီးတစ်ဦး လာရောက်ပြီး ဆိုင်ရှင်အမျိုးသမီးအား ရိုက်နှက်ကာ လုယက်မှုဖြစ်ပွားခဲ့ကြောင်း သတင်းရင်းမြစ်များအရ သိရသည်။

ဖြစ်စဉ်အရ အဆိုပါ အမျိုးသားနှင့် အမျိုးသမီးနှစ်ဦးသည် ဆိုင်သို့ ဝင်ရောက်လာပြီး ငွေတောင်းခံခဲ့ကြောင်း၊ ဆိုင်ရှင်အမျိုးသမီးက ငွေပေးရန် ငြင်းဆန်သဖြင့် အမျိုးသားက တုတ်ဖြင့် ဦးခေါင်းကို ရိုက်နှက်ခဲ့ကြောင်း သိရသည်။

ရိုက်နှက်ခံရသည့် ဆိုင်ရှင်အမျိုးသမီးမှာ ဦးခေါင်းဒဏ်ရာရရှိခဲ့သဖြင့် ဆေးရုံသို့ ပို့ဆောင်ကုသခဲ့ရကြောင်းနှင့် အသက်အန္တရာယ်စိုးရိမ်ရသည့် အခြေအနေမရှိကြောင်း သတင်းများတွင် ဖော်ပြထားသည်။

အဆိုပါဖြစ်စဉ်နှင့်ပတ်သက်၍ ကျူးလွန်သည်ဟုဆိုသူ အမျိုးသားနှင့် အမျိုးသမီးနှစ်ဦးအပါအဝင် ကြံရာပါတစ်ဦး စုစုပေါင်း ၃ ဦးကို ဖမ်းဆီးထားကြောင်း သတင်းရင်းမြစ်တစ်ခုက ဖော်ပြထားသည်။

ထို့အပြင် ကျူးလွန်သူနှစ်ဦးသည် ဖြစ်စဉ်မဖြစ်ပွားမီ ရက်ပိုင်းအတွင်း အဆိုပါဆိုင်သို့ ပစ္စည်းတစ်ခု လာရောက်ပေါင်နှံခဲ့ဖူးပြီး ယင်းပစ္စည်းအတွက် ငွေကြေးကိစ္စနှင့် ဆက်စပ်၍ ပြန်လည်လာရောက်ခဲ့ခြင်းဖြစ်ကြောင်းလည်း သတင်းရင်းမြစ်တစ်ခုတွင် ဖော်ပြထားသည်။

သို့သော် လုယက်ခံရသည့် ရွှေထည်နှင့် ငွေကြေးပမာဏ၊ ဖမ်းဆီးခံထားရသူများ၏ အမည်နှင့် အသေးစိတ်အမှုဖွင့်ထားသည့် ဥပဒေပုဒ်မများကို လက်ရှိအချိန်အထိ ယုံကြည်စိတ်ချရသည့် ရင်းမြစ်များမှ အတည်ပြုနိုင်ခြင်း မရှိသေးပေ။

မြို့တော် News Channel