ပေါ်တာဆွဲခံရသူတွေကို ပြန်လည်ထုတ်ပေးမယ်လို့ဆိုကာ စစ်တပ်အရာရှိဟန်ဆောင် လိမ်လည်ခဲ့သူ ၃ ဦး ဖမ်းဆီးခံရ

ပေါ်တာဆွဲခံရသူတွေကို ပြန်လည်ထုတ်ပေးမယ်လို့ဆိုကာ စစ်တပ်အရာရှိဟန်ဆောင် လိမ်လည်ခဲ့သူ ၃ ဦး ဖမ်းဆီးခံရ

အောက်တိုဘာ ၁၀

လူမှုကွန်ယက်မှာ အာဏာသိမ်းစစ်တပ်ရဲ့ အရာရှိတွေအဖြစ် ဟန်ဆောင်ပြီး စစ်မှုထမ်း ပေါ်တာဆွဲဖမ်းဆီးခံရသူတွေကို ပြည်လည်ထုတ်ပေးမယ်လို့ဆိုကာ ငွေကြေးလိမ်လည်ခဲ့သူ ၃ ဦးကို ဖမ်းဆီးလိုက်တယ်လို့ သိရပါတယ်။

အဆိုပါ လိမ်လည်သူ ၃ ဦးကို စက်တင်ဘာလအတွင်း တောင်ငူမြို့၊ ရွှေကျင်မြို့နယ်နဲ့ မြောင်းမြမြို့တို့မှာ အသီးသီး ဖမ်းဆီးရမိခဲ့တာ ဖြစ်တယ်လို့ သိရပါတယ်။

'ဗိုလ်ကြီး သူရဇော်'နဲ့ 'ဗိုလ်ကြီး' ဆိုပြီး TikTok အကောင့် အသုံးပြုကာ ငွေကြေးလိမ်လည်ခဲ့သူကို စက်တင်ဘာလ ၃ ရက်နေ့က တောင်ငူမြို့မှာ လည်းကောင်း၊ 'မင်းကိုကို' TikTok အကောင့် အသုံးပြုကာ လိမ်လည်ခဲ့သူ စိုးသူရအောင်ကို စက်တင်ဘာလ ၁၇ ရက်နေ့က ရွှေကျင်မြို့နယ်မှာ လည်းကောင်း၊ 'ဗိုလ်ကြီး ထက်ကောင်းနိုင်' TikTok အကောင့်နဲ့ လိမ်လည်ခဲ့သူကို စက်တင်ဘာလ ၂၆ ရက်နေ့က မြောင်းမြမြို့မှာလည်းကောင်း အသီးသီးဖမ်းဆီးရမိခဲ့တာလို့ သိရပါတယ်။

“ပြည်သူတွေ ကြောက်လန့်နေတဲ့ အကြောင်းအရာကို ခုတုံးလုပ်ပြီး လိမ်တာပါ။ အပြင်မှာလည်း ပေါ်တာဆွဲ ဖမ်းဆီးတာတွေက တကယ်ဖြစ်နေတာဆိုတော့ ပြန်ထုတ်လို့ ရလို့ရငြား မိသားစုဝင်တွေက အားကိုးမိတာပေါ့။ တာဝန်ရှိသူတွေနဲ့ ပေါင်းပြီး ငွေယူပြီး ထုတ်ပေးနေတဲ့ သူတွေလည်း ရှိတယ်။ ဈေးနှုန်းသတ်မှတ်ချက်တွေနဲ့ တရားဝင်လိုကို လုပ်စားနေကြတာ။ သူတို့ကိုပါ အရေးယူရမှာ" လို့ ပေါ်တာဆွဲ ဖမ်းဆီးခံရပြီး ငွေပေးထုတ်ခဲ့ဖူးသူ မိသားစုဝင်တဦးက မြို့တော်ကို ပြောပါတယ်။

စစ်ဆေးချက်တွေအရ ဖမ်းဆီးခံရသူ ၃ ဦးဟာ လူမှုကွန်ယက်မှာ အာဏာသိမ်းစစ်တပ်က အရာရှိဆိုသူတွေရဲ့ ဓာတ်ပုံနဲ့ video တွေကို အသုံးပြုကာ အကောင့်အတုတွေ ဖွင့်ပြီး ပေါ်တာဆွဲ ဖမ်းဆီးခံရသူတွေကို ပြန်လည်ထုတ်ပေးမယ်လို့ဆိုကာ ငွေကြေးလိမ်လည် ရယူခဲ့တာဖြစ်တယ်လို့ ဆိုပါတယ်။

လတ်တလောမှာတော့ ဖမ်းဆီးရမိသူ ၃ ဦးကို ဆက်လက်အရေးယူနိုင်ရေး စစ်ဆေးမှုတွေ လုပ်ဆောင်နေတယ်လို့ သိရပါတယ်။

မြို့တော် News Channel