Teacher Dies, 1 Killed as Boat Capsizes on Shopping Trip for School Ceremony

ကရင်ပြည်နယ်၊ ကော့ကရိတ်မြို့နယ်မှာ ကျောင်းသား၊ ကျောင်းသူတွေရဲ့ လက်ချည်ပွဲအတွက် အင်္ကျီတွေ သွားဝယ်ယူပြီးအပြန် ဖောင်စက်လှေတိမ်းမှောက်လို့ ကျောင်းဆရာမ ၁ ဦး ရေနစ် သေဆုံးခဲ့တယ်လို့ ဒေသခံတွေ ကတဆင့် သိရပါတယ်။

ဩဂုတ်လ ၂၄ ရက် နေ့လည် ၁၂ နာရီခွဲခန့်က ကော့ကရိတ်မြို့နယ်၊ ကော့ခိုက်ကျေးရွာနဲ့ နွားခြံကုန်းကျေးရွာကြားမှာ စက်ပျက်ပြီး တိမ်းမှောက်ခဲ့တာကြောင့် စက်လှေပေါ်ပါလာသူ ကျောင်းဆရာမ ၄ ဦးနဲ့ အရပ်သား ၄ ဦး ရေနစ်ခဲ့ပြီး စက်လှေပေါ်ပါလာတဲ့ ဆိုင်ကယ် ၂ စီးလည်း ရေထဲ နစ်မြုပ်သွားခဲ့တယ်လို့ သိရပါတယ်။

"စက်လှေက ဝန်များသွားတာ။ လူ ၈ ယောက်နဲ့ ဆိုင်ကယ် ၂ စီး၊ တခြားကုန်တွေကော သယ်ပြီးအပြန် ဖြစ်တာ။ ရေပြင်ကလည်း ကျယ်နေတာ၊ ရေလည်မှာ စက်လှေက စက်ပျက်တာ။ ရေစီးနဲ့ လည်သွားပြီး မှောက်တာ။ မှောက်တဲ့နေရာက ရေတက်ပြီး လယ်တွေ မြုပ်နေတဲ့ နေရာပါ" လို့ ဒေသခံတဦးက ပြောပါတယ်။

ကျောင်းဆရာမ ၄ ဦး စလုံးဟာ ရေမကူးတတ်တာကြောင့် ရေထဲပြုတ်ကျ မျောပါသွားခဲ့ပြီး ဆရာမ ၃ ဦးကို အချိန်မီ ကယ်ဆယ်နိုင်ခဲ့ပေမယ့် ဆရာမ နန်းမြင့်ဆန်းဦးကတော့ ရေစီးနဲ့ အတူ မျောပါသွားခဲ့တယ်လို့ သိရပါတယ်။

"ဆရာမ ၄ ယောက်လုံးက ကျောင်းက လက်ချည်ပွဲအတွက် အဝတ်တွေ သွားဝယ်ကြတာ။ အပြန်မှာ ခုလိုဖြစ်တာ။ ဆရာမ ၄ ‌ယောက်လုံးက တခြားနယ်က ပြောင်းလာကြတာ ရေမကူးတက်ကြဘူး။ ဖြစ်ဖြစ်ချင်း ၃ ယောက်ကို ကယ်လိုက်နိုင်တယ်။ တယောက်ကတော့ ရေစီးနဲ့ ပါပြီး ပျောက်သွားတာ။ ရွာကလူတွေ လိုက်ဆယ်ကြပေမယ့် အချိန်ကြာပီး အလောင်းပဲရတော့တာ" လို့ ဒေသခံတဦးက ပြောပါတယ်။

ရေနစ်သေဆုံးခဲ့တဲ့ ကျောင်းဆရာမဟာ ကော့ကရိတ်မြို့နယ်၊ နွားခြံကုန်းကျေးရွာရှိ အခြေခံပညာအလယ်တန်းကျောင်းမှာ တာဝန်ထမ်းဆောင်နေသူဖြစ်ပြီး ရုပ်အလောင်းကိုတော့ သြဂုတ် ၂၅ ရက်နေ့က တာဝန်ကျရာ ကျေးရွာမှာပဲ သင်္ဂြိုဟ်ခဲ့ကြတယ်လို့ သိရပါတယ်။