မဟာအောင်မြေ ကျောက်ဝိုင်းအတွင်း PDF ကို အကြောင်းပြကာ ဓားနဲ့ ထောက်ပြီး လုယက်ခဲ့တဲ့ တရားခံ ၄ ဦးကို ဖမ်းဆီးရမိ

မန္တလေးမြို့၊ မဟာအောင်မြေ ကျောက်မျက်ရတနာရောင်းဝယ်ရေးစခန်းမှာ ကျောက်လုပ်ငန်းရှင်တဦးကို PDF နဲ့ ပတ်သက်နေတယ်လို့ဆိုကာ ဓားနဲ့ ထောက်ပြီး ကျပ်သိန်း ၅၀၀ ခန့် တန်ဖိုးရှိ ကျောက်စိမ်းလက်ဝတ်ရတနာတွေ လုယက်ခဲ့တဲ့ တရားခံ ၄ ဦးကို ဖမ်းဆီးရမိပြီလို့ သိရပါတယ်။

သြဂုတ်လ ၁၈ ရက် မနက် ၁၀ နာရီခန့်က မဟာအောင်မြေမြို့နယ်၊ ၈၆ လမ်းနဲ့ ၈၇ လမ်းကြား၊ ၃၉ လမ်းနဲ့ ၄၀ လမ်းကြားရှိ မဟာအောင်မြေကျောက်မျက်ရတနာရောင်းဝယ်ရေးစခန်းအတွင်း ကျောက်စိမ်းရောင်းဝယ်ရေး လုပ်ကိုင်သူ ကိုထက်အောင်ကို အမည်မသိ အမျိုးသား ၂ ဦး က "PDF နဲ့ ပတ်သက်နေလို့ စစ်ဆေးစရာရှိတယ်"လို့ ဆိုကာ ဓားနဲ့ ထောက်ပြီး ခေါ်ထုတ်သွားခဲ့တယ်လို့ ဆိုပါတယ်။

အဲဒီနောက် ကိုထက်အောင်ကို ဘောလုံးကွင်းအဟောင်း ဖျက်နေတဲ့နေရာကို ခေါ်ဆောင်သွားပြီး ကိုထက်အောင်ရဲ့ လွယ်အိတ်ထဲက ကျောက်စိမ်းအချောထည် ၂ ပွင့်၊ ကျောက်စိမ်းဆွဲကြိုး ၂ ကုံး၊ ချွမ်အမျိုးအစား လည်ဆွဲ ၁ ကုံး၊ ချွမ်အမျိုးအစား လက်စွပ် ၂ ကွင်းနဲ့ ကျောက်စိမ်းနားကပ် ၁ စုံ စုစုပေါင်း ကာလတန်ဖိုး ကျပ်သိန်း ၅၀၀ ခန့်ရှိ ကျောက်စိမ်းလက်ဝတ်ရတနာတွေကို လုယူထွက်ပြေးသွားခဲ့တယ်လို့ သိရပါတယ်။

"ဖြစ်တဲ့နေ့ညမှာပဲ နောက်ကနေခိုင်းတဲ့ ၂ ယောက်ကို မန္တလေးမှာ အရင်မိတာ။ နောက်ရက်ကျမှ လုယက်ခဲ့တဲ့ ၂ ယောက်ကို စစ်ကိုင်းဘက်မှာ ဖမ်းမိတာ။ ခိုင်းတဲ့ ၂ ယောက်က လုယူလာတဲ့ ကျောက်စိမ်းတွေကို မန္တလေးမှာ ပြန်ရောင်းဖို့လုပ်ပြီး လုယက်ခဲ့တဲ့ ၂ ယောက်ကိုတော့ စစ်ကိုင်းဘက် ရှောင်တိမ်းခိုင်းထားတာ" လို့ ရဲတပ်ဖွဲ့နဲ့ နီးစပ်သူတဦးက ပြောပါတယ်။

အဆိုပါ လုယက်မှုကို အသက် ၂၀ အရွယ် လူငယ် ၂ ဦးနဲ့ အသက် ၃၀ ခန့်အရွယ် အမျိုးသား ၂ ဦးတို့က ပူးပေါင်း ကျူးလွန်ခဲ့တာဖြစ်ပြီး အမှတ် (၇) နယ်မြေရဲစခန်းက ရာဇသတ်ကြီးပုဒ်မ ၃၉၂ နဲ့ အမှုဖွင့် အရေးထားတယ်လို့ သိရပါတယ်။