မူးယစ်မှုနဲ့ အဖမ်းခံထားရသူ ဆေးရုံမှာ ပြသနေစဉ် ထွက်ပြေးခဲ့ပေမယ့် ပြန်လည်အဖမ်းခံရ

မူးယစ်မှုနဲ့ အဖမ်းခံထားရသူ ဆေးရုံမှာ ပြသနေစဉ် ထွက်ပြေးခဲ့ပေမယ့် ပြန်လည်အဖမ်းခံရ

နိုဝင်ဘာလ ၆

ရှမ်းပြည်နယ်၊ တောင်ကြီးမြို့၊ စဝ်စံထွန်းဆေးရုံမှာ ဆေးကုသနေစဉ် ထွက်ပြေးခဲ့တဲ့ အချုပ်သား ပြန်လည်အဖမ်းခံခဲ့ရတယ်လို့ သိရပါတယ်။

နိုဝင်ဘာလ ၅ ရက်နေ့ ညနေပိုင်းက ဟိုပုံးမြို့ အနောက်ရပ်ကွက်၊ သီရိမင်္ဂလာရွှေချမ်းသာ မွေတော်ဘုရားကြီးအတွင်းရှိ အရန်စေတီတွေကြားမှာ ပြန်လည်ဖမ်းဆီးရမိခဲ့တာလို့ သိရပြီး မူးယစ်မှုနဲ့ ဖမ်းဆီးခံထားရသူ ဖြစ်တယ်လို့ သိရပါတယ်။

“တောင်ကြီး စဝ်စံထွန်းဆေးရုံမှာ ဓာတ်မှန်ခန်းထဲကနေ ထွက်ပြေးတာ။ သူက အေးသာယာရဲစခန်းမှာ မူးယစ်မှုနဲ့ အဆွဲခံထားရတာကနေ နေမကောင်းလို့ ရဲ ၃ ယောက်စောင့်ကြပ်ပြီး ဆေးရုံလာတက်တာ။ ထွက်ပြေးပြီးတော့ ဟိုပုံးမြို့ကနေ ပြန်ဖမ်းမိတယ်။ ထုရိုက်တာတော့ မရှိဘူး၊ ရောဂါသည်ဖြစ်နေတော့ သူတို့လက်ထဲ သေသွားမှာကြောက်လို့ ကြားတယ်” လို့ ဒေသခံတဦးက ပြောပါတယ်။

နိုဝင်ဘာလ ၄ ရက်နေ့၊ နေ့လယ် ၁၂ နာရီခန့်က ကိုယ်ပူပြီး ချောင်းဆိုးနေလို့ တောင်ကြီးမြို့ စဝ်စံထွန်းဆေးရုံမှာ ဓာတ်မှန်ရိုက်ဖို့ ပြသနေချိန် ခေတ္တလက်ထိပ်ဖြုတ်ပေးပြီးနောက် ဆေးရုံဓာတ်မှန်ခန်းထဲကနေ ထွက်ပြေးသွားခဲ့တာလို့ သိရပါတယ်။

လတ်တလောမှာ ထွက်းပြေးခဲ့တဲ့ မူးယစ်မှုနဲ့ ဖမ်းဆီးခံရသူ ကိုဝဏ္ဏအောင် ဆိုသူကို ဟိုပုံးရဲစခန်းကနေ တောင်ကြီး နယ်မြေရဲစခန်းကို ပြန်လွှဲပြောင်းလိုက်ပြီလို့ သိရပြီး မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေပုဒ်မ ၁၉ (က)/၂၁ နဲ့ တရားစွဲထားတယ်လို့ သိရပါတယ်။

ပြီးခဲ့တဲ့ ၂၀၂၀ ခုနှစ် ဇူလိုင် ၁၃ ရက်နေ့ကလည်း တောင်ကြီးမြို့နယ် ရဲစခန်းကနေ ဖမ်းဆီးထိန်းသိမ်းခံထားရတဲ့ အချုပ်သား ၂ ဦး ထွက်ပြေးခဲ့တဲ့ ဖြစ်စဉ် ဖြစ်ပွားခဲ့ပါသေးတယ်။

မြို့တော် News Channel