ကားပေါ် ဂျင်းဘောင်းဘီတွေ သယ်လာလို့ဆိုကာ ယာဥ်မောင်းနဲ့ အတူပါသူတွေကို ပို့ကုန်သွင်းကုန်ဥပဒေနဲ့ ဖမ်းဆီး

ကားပေါ် ဂျင်းဘောင်းဘီတွေ သယ်လာလို့ဆိုကာ ယာဥ်မောင်းနဲ့ အတူပါသူတွေကို ပို့ကုန်သွင်းကုန်ဥပဒေနဲ့ ဖမ်းဆီး

အောက်တိုဘာ ၁၉

ရှမ်းပြည်နယ်တောင်ပိုင်း၊ ဆိုက်ခေါင်ဘက်ကနေ တောင်ကြီးမြို့ကို ဂျင်းဘောင်းဘီတွေ သယ်ဆောင်လာလို့ဆိုကာ အန်စာတုံး မော်တော်ယာဉ်တစီးကို အာဏာသိမ်းစစ်တပ်က ဖမ်းဆီးခဲ့တယ်လို့ သိရပါတယ်။

အောက်တိုဘာလ ၁၅ ရက်နေ့ ညပိုင်းက ဖာမွန်းကျေးရွာအနီး ဆိုက်ခေါင်ဘက်ကနေ တောင်ကြီးဘက်ကို မောင်းနှင်လာတဲ့ အန်စာတုံး မော်တော်ယာဉ်လိုင်းကားကို အာဏာသိမ်းစစ်တပ်လက်အောက်ခံ ပူးပေါင်းအဖွဲ့က ရပ်တန့်စစ်ဆေးခဲ့ကာ ကားအနောက်ခန်းထဲက တရုတ်ဂျင်းဘောင်းဘီတွေကို သိမ်းဆည်းခဲ့ပြီး ယာဥ်မောင်းနဲ့ အတူပါလာသူတွေကိုလည်း ဖမ်းဆီးခဲ့တယ်လို့ သိရပါတယ်။

“အဲ့လိုတွေ လျှောက်ဖမ်းနေလို့ ကုန်ဈေးနှုန်းတွေတက်တာ။ ကားဆီစရိတ်၊ ဂိတ်ကြေးတွေနဲ့ တချို့ အခွန်စရိတ်တွေနဲ့က တွက်ခြေမကိုက်တော့လို့ တချို့ကားလိုင်းတွေ ခေတ္တရပ်နားထားရတာတွေလည်း ရှိတယ်။ တချို့ကျ ရတဲ့ပစ္စည်းသယ်ပြီး အသက်ဆက်မွေးနေကြရတယ်” လို့ ကုန်ကားသမားတဦးက ပြောပါတယ်။

အာဏာသိမ်းစစ်တပ်ရဲ့ သတင်းထုတ်ပြန်ချက်အရ တန်ဖိုးငွေကျပ်သိန်း ၄၅၀ ကျော်တန်ဖိုးရှိ တရုတ်နိုင်ငံထုတ် ဂျင်းဘောင်းဘီတွေကို သယ်ဆောင်လို့ဆိုကာ အမျိုးသား ၃ ဦးကို တောင်ကြီးမြို့မရဲစခန်းမှာ ပို့ကုန်/သွင်းကုန် ဥပဒေပုဒ်မ ၈/၁၀ နဲ့ အမှုဖွင့်ထားတယ်လို့ သိရပါတယ်။

မြို့တော် News Channel