မကွေးမှာ တက္ကသိုလ်ကျောင်းသားတွေကို အခြေခံစစ်သင်တန်း စတင်ပေးနေပြီး အလယ်တန်းနဲ့ အထက်တန်းကျောင်းသားတွေကိုပါ စစ်သင်တန်းပေးဖို့ ပြင်နေ

မကွေးမှာ တက္ကသိုလ်ကျောင်းသားတွေကို အခြေခံစစ်သင်တန်း စတင်ပေးနေပြီး အလယ်တန်းနဲ့ အထက်တန်းကျောင်းသားတွေကိုပါ စစ်သင်တန်းပေးဖို့ ပြင်နေ

အောက်တိုဘာ ၂၁

မကွေးတိုင်းထဲက မကွေးမြို့ရှိ တက္ကသိုလ်ကျောင်းသာတွေကို ပထမဆုံးအကြိမ် အခြေခံစစ်ပညာသင်တန်း စတင်ပေးနေပြီး အလယ်တန်းနဲ့ အထက်တန်းကျောင်းသားတွေကိုပါ စစ်သင်တန်းပေးဖို့ ပြင်နေတယ်လို့ သိရပါတယ်။

အောက်တိုဘာ ၁၉ ရက်နေ့က စတင်ကာ နယ်မြေခံ တပ်စခန်းတွေမှာ အခြေခံစစ်သင်တန်းတွေ စတင် ဖွင့်လှစ်ခဲ့တာဖြစ်ပြီး မကွေးမြို့က မကွေးတပ်ရင်း ၃၀၁ မှာ အခြေခံစစ်သင်တန်း အပတ်စဉ်(၁) ကို စတင် သင်တန်းပို့ချနေတာလို့ သိရပါတယ်။

“ကလေးတွေကို သေလမ်းပို့ဖို့ ပြင်နေတာလို့ပဲ မြင်တယ်၊ အားကစားစိတ်ဓာတ်တွေ ကျန်းမာရေးကောင်းတာတွေက လျှောက်ပြောနေတာ။ စစ်မှုထမ်းစုဆောင်းဖို့ လူမရတဲ့ နောက်ပိုင်း ကျောင်းသားတွေကို တဖက်လှည့်နဲ့ ပုံစံသွင်းလာတာ” လို့ မကွေးတက္ကသိုလ်က ဆရာမတဦးက ပြောပါတယ်။

နောက်အပတ်စဉ်တွေမှာ တက္ကသိုလ်တက်ရောက်နေတဲ့ ကျောင်းသားတွေနဲ့ တက္ကသိုလ်ဝင်တန်းအောင်မြင်ပြီး ကျောင်းဆက်တက်မယ့် ကျောင်းသား၊ ကျောင်းသူတွေကိုလည်း သင်တန်းပေးဖို့ စီစဉ်နေပြီး၊ အလယ်တန်းနဲ့ အထက်တန်းကျောင်းတွေမှာပါ စစ်အခြေခံသင်တန်း ပေးဖို့ ပြင်နေတယ်လို့ သိရပါတယ်။

စစ်သင်တန်း အပတ်စဉ်တခုကို ၆ ပတ်ခန့် ကြာမယ်လို့ သိရပြီး အပတ်စဉ်တခုကို လူ ၃၀၀ ခန့်နဲ့ စတင်သွားမယ်လို့ သိရပါတယ်။ ပထမအသုတ်ကိုတော့ မကွေးတပ်ရင်း ၃၀၁ မှာ စတင် သင်တန်းပေးနေပြီး ကျောင်းသူတွေကိုတော့ လက်ရှိမှာ ယာယီ ဆိုင်းငံ့ထားတယ်လို့ သိရပါတယ်။

မြို့တော် News Channel