အာဏာသိမ်းပြီးနောက်ပိုင်း ထိုင်းမှာ မြန်မာမိခင်တွေက မွေးဖွားတဲ့ကလေး တစ်သိန်းသုံးသောင်းကျော် ရှိလာပြီလို့ဆို

မြန်မာနိုင်ငံမှာ ၂၀၂၁ ခုနှစ် အာဏာသိမ်းပြီးနောက်ပိုင်း ထိုင်းနိုင်ငံရောက် မြန်မာမိခင်တွေက မွေးဖွားတဲ့ ကလေးအရေအတွက်ဟာ သိသိသာသာ မြင့်တက်လာခဲ့ပြီး ၂၀၂၁ ခုနှစ်ကနေ ၂၀၂၆ ခုနှစ် ဩဂုတ် ၂၁ ရက်အထိ စုစုပေါင်း ၁၃၁,၈၆၀ ဦး ရှိတယ်လို့ ထိုင်းပြည်သူ့ကျန်းမာရေးဝန်ကြီးဌာနရဲ့ အချက်အလက်တွေအရ သိရပါတယ်။

နှစ်အလိုက်စာရင်းတွေအရ ၂၀၂၁ ခုနှစ်မှာ မွေးဖွားမှု ၁၈,၉၀၅ ဦး၊ ၂၀၂၂ ခုနှစ်မှာ ၁၈,၇၂၈ ဦး ရှိခဲ့ပြီး ၂၀၂၃ ခုနှစ်မှာ ၂၄,၁၅၄ ဦး၊ ၂၀၂၄ ခုနှစ်မှာ ၂၅,၀၈၇ ဦးအထိ မြင့်တက်လာပါတယ်။ ၂၀၂၅ ခုနှစ်မှာတော့ ၂၈,၈၆၉ ဦးအထိ ရှိခဲ့ပြီး တစ်နှစ်တာအတွင်း မွေးဖွားမှု အများဆုံး ဖြစ်တယ်လို့ ဆိုပါတယ်။

၂၀၂၆ ခုနှစ်အတွက်တော့ ဩဂုတ် ၂၁ ရက်အထိ မြန်မာမိခင်တွေက မွေးဖွားတဲ့ကလေး ၁၆,၁၁၇ ဦး ရှိနေပြီ ဖြစ်တယ်လို့ သိရပါတယ်။

မြန်မာနိုင်ငံမှာ ၂၀၂၁ ခုနှစ် ဖေဖော်ဝါရီ ၁ ရက်နေ့မှာ စစ်တပ်က အာဏာသိမ်းပြီးနောက်ပိုင်း အကြမ်းဖက်မှုတွေနဲ့ လုံခြုံရေးမတည်ငြိမ်မှုတွေကြောင့် အိမ်နီးချင်းနိုင်ငံတွေဆီ ရွှေ့ပြောင်းနေထိုင်မှုတွေ သိသိသာသာ မြင့်တက်လာခဲ့ပါတယ်။

ထိုင်းနိုင်ငံဘက်ကိုလည်း မြန်မာနိုင်ငံကနေ ထွက်ပြေးတိမ်းရှောင်လာသူတွေ ဝင်ရောက်လာခဲ့ပြီး ၂၀၂၁ ခုနှစ် ဖေဖော်ဝါရီကနေ ၂၀၂၃ ခုနှစ် စက်တင်ဘာအထိ ထိုင်းအစိုးရရဲ့ မှတ်တမ်းတွေအရ မြန်မာနိုင်ငံသား ၄၅,၀၂၅ ဦးဟာ တိုက်ပွဲတွေကြောင့် ထိုင်းနိုင်ငံမှာ ယာယီခိုလှုံဖို့ ဝင်ရောက်လာခဲ့တယ်လို့ UNHCR က ဖော်ပြထားပါတယ်။

၂၀၂၆ ခုနှစ် ဇူလိုင်လမှာ HITAP Foundation က ထုတ်ပြန်ခဲ့တဲ့ ထိုင်း-မြန်မာနယ်စပ်ရှိ ရွှေ့ပြောင်းသူတွေရဲ့ မိခင်နဲ့ မွေးကင်းစ ကလေးငယ်ကျန်းမာရေးဆိုင်ရာ အစီရင်ခံစာအရ အထောက်အထားမဲ့ မြန်မာကိုယ်ဝန်ဆောင် အမျိုးသမီးတွေနဲ့ ကလေးငယ်တွေဟာ ရွှေ့ပြောင်းနေထိုင်မှုနဲ့ ကျန်းမာရေးစနစ်ဆိုင်ရာ အခက်အခဲတွေကြောင့် ပိုမိုထိခိုက်လွယ်တဲ့အုပ်စု ဖြစ်လာနေတယ်လို့ ဖော်ပြထားပါတယ်။

Ref & Photo; Thaiger