ကောက်ယူလာတဲ့ ၄၀ မမ ဗုံးသီးကို ဆော့ကစကားရာက ပေါက်ကွဲပြီး ကိုရင် ၂ ပါး သေဆုံးကာ ၅ ပါး ပြင်းထန်ဒဏ်ရာရ

မကွေးတိုင်း၊ ဆိပ်ဖြူမြို့နယ်၊ အင်ကြင်းပင်ကျေးရွာ ဘုန်းကြီးကျောင်းက ကိုရင်လေးတွေ ကောက်ယူလာတဲ့ ၄၀ မမ ဗုံးသီး ပေါက်ကွဲခဲ့လို့ ကိုရင် ၂ ပါး သေဆုံးခဲ့ပြီး ကိုရင် ၅ ပါး နဲ့ ဘုန်းကြီးကျောင်းသား ၁ ယောက်လည်း ပြင်းထန်ဒဏ်ရာ ရရှိခဲ့ကြတယ်လို့ သိရပါတယ်။

သြဂုတ်လ ၂၄ ရက်နေ့က ဆွမ်းခံကြွပြီး ပြန်လာတဲ့ ကိုရင်ငယ်တွေက မပေါက်ကွဲသေးတဲ့ ၄၀ မမ ဗုံးသီးကို ဆွမ်းစားကျောင်းအထိ ယူဆောင်လာရာက နေ့လယ် ၁၁ နာရီခန့်မှာ ပေါက်ကွဲခဲ့တာ ဖြစ်တယ်လို့ သိရပါတယ်။

"အဲဒီရွာက စစ်တပ်နဲ့ နီးတော့ ပညာရေးအတွက် ဘုန်းကြီးကျောင်းမှာ ပညာသင်ရင်း ကိုရင် ဝတ်နေကြတာ။ စစ်တပ် စစ်ကြောင်း ထိုးတုန်းက လမ်းမှာ ကျကျန်နေတာလား။တမင်ချထားခဲ့တာလားတော့ မသိဘူး။ ကိုရင်လေးတွေက ဒါကို ဘာမှန်းမသိကြဘူး။ ကျောင်းနံရံကို ပစ်ပေါက်လိုက်တော့ ပေါက်ကွဲသွားတာ ထင်တယ်" လို့ ဒေသခံတဦးက ပြောပါတယ်။

၂၀၂၅ ခုနှစ်မှာ မြေမြုပ်မိုင်းနှင့် ပေါက်ကွဲစေတတ်တဲ့ စစ်လက်နက် ပစ္စည်းတွေကြောင့် မြန်မာနိုင်ငံမှာ ကလေးငယ် ၃၃ ဦး အပါအဝင် ပြည်သူ ၁၀၈ ဦး သေဆုံးခဲ့ပြီး ကလေးငယ် ၁၂၁ ဦး အပါအဝင် ၆၃၇ ဦး ထိခိုက်ဒဏ်ရာရရှိခဲ့တယ်လို့ UNICEF Myanmar က ထုတ်ပြန်ထားပါတယ်။