ကျောက်ပန်းတောင်းရပ်ကွက်အုပ်ချုပ်ရေးမှူး နေအိမ်တွင်း ဖမ်းဆီးခံရ

မြို့ပေါ်က အုပ်ချုပ်ရေးမှူးကို နေအိမ်ထဲအထိ ဝင်ရောက်ဖမ်းဆီး ခံခဲ့ရတာကြောင့် တိုင်းအစိုးရအဖွဲ့က အစည်းအဝေးခေါ်ပြီး ဆဲဆို

၂၀၂၆ သြဂုတ် ၂၆ Myo Taw

မန္တလေးတိုင်း၊ ကျောက်ပန်းတောင်းမြို့ပေါ်က ရပ်ကွက်အုပ်ချုပ်ရေးမှူးကို လက်နက်ကိုင် အဖွဲ့တခုက ဩဂုတ်လ ၂၅ ရက်နေ့ ည ၇ နာရီခန့်မှာ ဝင်ရောက်ဖမ်းဆီးသွားခဲ့တယ်လို့ သိရပါတယ်။

ကျောက်ပန်းတောင်းမြို့၊ ဘူတာရပ်ကွက်ရဲ့ အုပ်ချုပ်ရေးမှူး ဦးမောင်ဆန်း ကို သေနတ်တွေ ကိုင်ဆောင်ထားတဲ့ လူ ၃ ဦးခန့်က ဆိုင်ကယ် ၂ စီးနဲ့ လာရောက်ခေါ်သွားတာလို့ သိရပါတယ်။

"သူက စစ်တပ်အတွက် စစ်မှုထမ်းငွေ ကောက်ပေးတယ်ဆိုပြီး ပြောနေကြတာ ကြာပီ၊ တခြား အိမ်ခြံမြေကိစ္စ ဧည့်စာရင်းကိစ္စကအစ ငွေတောင်းတာတွေလည်း အသံထွက်ထားတယ်၊ ခုဖမ်းတဲ့သူတွေက ဘယ်ဘက်က ဝင်ဖမ်းသွားတယ်ဆိုတာတော့ မသိသေးဘူး" လို့ ဒေသခံတဦးက ပြောပါတယ်။

မြို့ပေါ်က ရပ်ကွက်အုပ်ချုပ်ရေးမှူးကို ညအစောပိုင်းမှာပဲ ဝင်ရောက်ဖမ်းဆီးခံခဲ့ရတာကြောင့် အာဏာသိမ်းအစိုးရလက်အောက်ခံ မန္တလေးတိုင်း အစိုးရအဖွဲ့က ဒီကနေ့ နေ့လယ်ပိုင်းမှာ Zoom အစည်းအဝေးခေါ်ပြီး မြို့နယ်(ထွေ/အုပ်)နဲ့ ကော်မတီက အရာရှိကြီးတွေကို 'ငါ' နဲ့ ကိုင်တုတ်ကာ ဆဲဆိုတာတွေအထိ ရှိခဲ့တယ်လို့ သိရပါတယ်။

အုပ်ချုပ်ရေးမှူး ဖမ်းဆီးခံခဲ့ရတဲ့ညက ရဲ နဲ့ စစ်သားတွေဟာ နေအိမ်ကို လာရောက်စစ်ဆေးခဲ့ပြီး ပတ်ဝန်းကျင်ကိုလည်း စစ်ဆေးမေးမြန်းခဲ့ပေမဲ့ တိကျတဲ့အဖြေ မရခဲ့တာတွေကြောင့် အထက်က ဆဲဆိုကြိမ်းမောင်းခံနေရတာလို့လည်း သိရပါတယ်။

ကျောက်ပန်းတောင်းမြို့ပေါ်ဟာ အာဏာသိမ်းစစ်တပ်နဲ့ ပျူ၊ ရဲတပ်ဖွဲ့အပြင် တခြားသော စစ်တပ်ထောက်ခံသူတွေ အားကောင်းပြီး မြို့အဝင်အထွက်တွေနဲ့ လမ်းဆုံလမ်းခွတွေမှာ အမြဲတမ်း လုံခြုံရေးတင်းကြပ်ထားတဲ့ မြို့ဖြစ်တယ်လို့လည်း သိရပါတယ်။