တောင်ပြုံးပွဲမှာ ယခင်နှစ်တွေထက် ခိုးဆိုလုယက်မှုတွေများနေပြီး ပြည်သူ့စစ်တွေကို တိုင်ပေမယ့် ကိုယ်ဖြစ်ကိုယ်ခံလို့သာ ပြန်လည်ပြောဆို

မန္တလေးတိုင်း၊ မတ္တရာမြို့နယ်မှာ နှစ်စဥ်ကျင်းပနေတဲ့ တောင်ပြုံးနတ်ပွဲမှာ ခါးပိုက်နှိုက်မှု၊ ဆွဲကြိုးလုယက်မှုတွေ ယခင်နှစ်တွေထက်ပိုကာ ဆိုးဆိုးရွားရွာဖြစ်နေပြီး အာဏာသိမ်းအစိုးရရဲ့ လက်နက်အပြည့်အစုံဝတ် လုံခြုံရေးပြည်သူ့စစ်တွေကို တိုင်ကြားပေမယ့် အရေးယူဆောင်ရွက်ပေးတာ မရှိဘူးလို့ သိရပါတယ်။

ဩဂုတ်လ ၂၁ ရက်နေ့ကနေ ၂၈ ရက်နေ့အထိ မတ္တရာမြို့နယ်၊ တောင်ပြုံးကျေးရွာမှာ ကျင်းပတဲ့ ရိုးရာနတ်ပူဇော်ပသတဲ့ မြန်မာနိုင်ငံမှာ ရက်အကြာဆုံးပွဲတော်တခုဖြစ်တဲ့ တောင်ပြုံးပွဲမှာ နေ့စဥ် အနယ်နယ်အရပ်ရပ်က လူပေါင်းသောင်းနဲ့ချီ လာရောက်ပူဇော်ပသမှုတွေ ပြုလုပ်နေကြပြီး ခိုးဆိုးလုယက်မှုတွေလည်း ယခင်နှစ်ထက် ပိုဆိုးလာတယ်လို့ သိရပါတယ်။

"ဖုန်းအခိုးခံရတာတို့ အဝတ်အထည် အခိုးခံရတာတို့က အရင်နှစ်တွေလည်း ရှိခဲ့ပါတယ်၊ အခုနှစ်ကတော့ အရမ်းဆိုးတယ်၊ ဆွဲကြိုးကို လူအရှေ့ကနေ ကိုင်ပြီးဖြုတ်သွားတာ၊ လိုက်အော်ပြီးဖမ်းတာကို ပြည်သူ့စစ်တွေ ကြားထဲဝင်ပြီး ထွက်ပြေးသွားတာ၊ ပြည်သူ့စစ်တွေကို အကူအညီတောင်းတော့ သူတို့က လုံခြုံရေးပဲယူပေးတာ၊ သူခိုးနဲ့ လုယက်မှုတွေ လိုက်မဖမ်းပေးနိုင်ဘူးလို့ပြောတယ်၊ ကျမတို့လိုပဲ အလုခံရတဲ့သူ ကျမတို့နန်းထဲတင် ၃ ယောက်ရှိတယ်၊ ဖုန်းနဲ့ ပိုက်ဆံအိတ် ပျောက်တာတွေမပါသေးဘူး၊ ဆွဲကြိုးတွေကို ပေါ်တင်ဆွဲဖြုတ်ခံရတာကို ၃ ယောက်ရှိတာ" လို့ တောင်ပြုန်းပွဲကပြန်လာတဲ့ LGBT တဦးက ပြောပါတယ်။

တောင်ပြုံးပွဲကိုလာကြတဲ့ အနယ်နယ်အရပ်ရပ်ကလူတွေကို ပြည်သူ့စစ်၊ ပျူစောထီးတွေက ကားတစီးကို ရွာဝင်ကြေးအဖြစ် ငွေကျပ် ၁၀၀၀၀၊ ယာဥ်အပ်ခ ၅၀၀၀၊ ဆိုင်ကယ်တစီးကို ရွာဝင်ကြေး ၅၀၀၀ နဲ့အပ်နှံခ ၃၀၀၀ နှုန်းကိုလည်း ကောက်ခံတယ်လို့သိရပြီး ပစ္စည်းပျောက်ရင်လည်း တာဝန်ယူတာမရှိဘူးလို့ သိရပါတယ်။

တောင်ပြုံးပွဲမှာ ခိုးဆိုလုယက်မှုနဲ့ ရန်ပွဲတွေ ယခင်နှစ်ထက် ပိုမိုအကျည်းတန်အောင် ဖြစ်နေတယ်လို့သိရပြီး

ပြည်သူ့စစ်နဲ့ ပျူစောထီးတွေကို တိုင်ကြားပေမယ့် ဖြေရှင်းပေးတာမရှိသလို တိုင်ကြားတဲ့သူတွေကိုလည်း "လုယက်မှုနဲ့ အခိုးခံရတဲ့ပြဿနာတွေ စခန်းကိုလာတိုင်တာ တရက်ကို အယောက် ၅၀ အထက်မှာရှိတယ်၊ ကိုယ်ဖြစ်ကိုယ်ခံပဲ၊ အဲ့တာတွေလိုက်ရှင်းပေးဖို့ ဒီမှာနေတာမဟုတ်ဘူး" လို့သာ ပြန်ပြောလွှတ်တယ်လို့ သိရပါတယ်။

တောင်ပြုံးရိုးရာနတ်ပွဲကို ယခုနှစ်မှာ ဝါခေါင်လပြည့် ဩဂုတ်လ ၂၈ နေ့အထိ ကျင်းပမှာဖြစ်ပြီး နတ်ကိုးကွယ်သူတွေ၊ အာဏာသိမ်းစစ်အစိုးရရဲ့ ထိပ်ပိုင်းခေါင်းဆောင်တွေရဲ့ ဇနီးသည်တွေနဲ့ အရာရှိတွေလည်း လာကြတယ်လို့ သိရပါတယ်။

တောင်ပြုံးပွဲတော်ဟာ မြန်မာနိုင်ငံအထက်ပိုင်းမှာ အစည်ကားဆုံးပွဲတော်တခုဖြစ်ပြီး တောင်ပြုံးကျေးရွာအတွင်းက ဆုတောင်းပြည့်စေတီတော်ရဲ့ ဗုဒ္ဓပူဇနိယပွဲတော်တခုဖြစ်ပြီး ဘုရားကိုအကြောင်းပြုကာ တောင်ပြုံးမင်းနှစ်ပါးပွဲတော်(ရိုးရာနတ်ပွဲ)အဖြစ် လူသိများကာ ပွဲတော်ကိုနှစ်စဉ် ဝါခေါင်လဆန်း ၁၀ ရက်တွင် ညီလာခံသဘင်ကျင်းပခြင်း၊ လဆန်း ၁၁ ရက်တွင် မင်းနှစ်ပါးချိုးရေတော်သုံးပွဲ ကျင်းပခြင်း၊ လဆန်း ၁၄ ရက်တွင် ယုန်ထိုးပွဲတော်ကျင်းပခြင်း၊ ဝါခေါင်လပြည့်နေ့တွင် ထိန်ပင်ခုတ်ပွဲတော် ကျင်းပခြင်းများကိုပြုလုပ်ပြီး နှစ်စဉ်ဝါခေါင်လဆန်း ၈ ရက်မှ ၁၅ ရက်ထိ ကျင်းပတယ်လို့လည်း သိရပါတယ်။