တာချီလိတ်မှာ အမျိုးသားတဦး သေနတ်ဖြင့် ပစ်သတ်ခံရပြီး သေဆုံး

တာချီလိတ်မှာ အမျိုးသားတဦး သေနတ်နဲ့ ပစ်သတ်ခံရတဲ့ အနေအထားနဲ့ သေဆုံးနေ

၂၀၂၆ သြဂုတ် ၂၄ Myo Taw

ရှမ်းပြည်နယ် အရှေ့ပိုင်း၊ တာချီလိတ်မြို့မှာ အမျိုးသားတဦး သေနတ်နဲ့ ပစ်သတ်ခံရတဲ့ အနေအထားနဲ့ သေဆုံးနေတာကို ဒေသခံတွေက တွေ့ရှိခဲ့ကြတယ်လို့ သိရပါတယ်။

သြဂုတ်လ ၂၃ ရက်နေ့ ည ၈ နာရီခန့်က တာချီလိတ်မြို့၊ ဝိန်းကျောက်ရပ်ကွက်၊ တော်ကော့တွင်းရပ်၊ တော်ကော့တွင်း (၄)လမ်းက "လိုမာ" ဟိုတယ်အနီးမှာ အသက် ၃၇ နှစ်အရွယ် အမျိုးသားတဦး သေနတ်ဒဏ်ရာနဲ့ သေဆုံးနေတာလို့ သိရပါတယ်။

သေဆုံးသူဟာ တာချီလိတ်မြို့၊ ဆန်ဆိုင်း(က)ရပ်ကွက်မှာ နေထိုင်တဲ့ အသက် ၃၇ နှစ်အရွယ် စိုင်းလှ ဆိုသူဖြစ်ပြီး ဝဲဘက်နားထင် ဖောက်ဝင်ဒဏ်ရာ ၁ ချက်နဲ့ သေဆုံးနေခဲ့တာလို့ သိရပါတယ်။

"တာချီလိတ်မှာက မူးယစ်ဆေးနဲ့ လုယက်မှုတွေ ခဏခဏ ဖြစ်တယ်။ အဓိကကတော့ ဆေးသုံးကြတာ။ ဒုစရိုက်ဂိုဏ်းတွေ များလာတော့ အခုလို အသတ်ခံရပြီဆိုရင်လည်း တရားခံမမိဘူး။ ရဲက ကြားကနေ ငွေယူပြီး ကျေအေးပေးလိုက်တာတွေလည်း ရှိတယ်" လို့ ဒေသခံတဦးက ပြောပါတယ်။

သေဆုံးသူရဲ့ ရုပ်အလောင်းဘေးက 9mm Luger ကျည်ခွံ ၁ ခုနဲ့ နိုင်ငံသားစိစစ်ရေးကတ် မှတ်ပုံတင်ကို ရဲက သိမ်းဆည်းသွားပြီး ရုပ်အလောင်းကိုတော့ တာချီလိတ် ခရိုင်ဆေးရုံကြီး ရင်ခွဲရုံကို ပို့ထားတယ်လို့ သိရပါတယ်။