ဘုတလင်ကွမ်းခြံ ဗုံးကြဲခံရ၊ အမျိုးသမီး ၆ ဦး သေဆုံး

ဘုတလင်မြို့နယ်၊ ကွမ်းခြံကျေးရွာ ဗုံးကြဲခံခဲ့ရတာကြောင့် အမျိုးသမီး ၆ ဦး အသက်ဆုံးရှုံး

၂၀၂၆ အောက်တိုဘာ ၂၁ Myo Taw

အောက်တိုဘာ ၂၁

စစ်ကိုင်းတိုင်း၊ ဘုတလင်မြို့နယ်၊ ကွမ်းခြံကျေးရွာကို အာဏာသိမ်း စစ်တပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် ဒေသခံအမျိုးသမီး ၆ ဦး အသက်ဆုံးရှုံးခဲ့တယ်လို့ ဘုတလင်မြို့နယ် လူသားစာနာအဖွဲ့က ထုတ်ပြန်ထားပါတယ်။

အောက်တိုဘာလ ၂၀ ရက်နေ့ မွန်းလွဲ ၂ နာရီခွဲခန့်က မုံရွာမြို့၊ အနောက်မြောက်တိုင်းစစ်ဌာနချုပ်မှ တက်လာတဲ့ ဂျိုင်ရိုကော်ပတာ ၁ စီးက ဘုတလင်မြို့နယ်၊ ကွမ်းခြံကျေးရွာကို ဗုံးသီး ၁ လုံး ကြဲချခဲ့ပြီးနောက် ဆူဆိုက်ဒရုန်း ၁ စီးနဲ့ ထပ်မံတိုက်ခိုက်ခဲ့တယ်လို့ ဆိုပါတယ်။

" ၄ ဦးက နေရာတင် ပွဲချင်းပြီး ဆုံးသွားတယ်။ ကျန်တဲ့ ၂ ဦးက ဆေးကုဖို့ သွားတဲ့လမ်းမှာ ဆုံးသွားတယ်" လို့ ဘုတလင်မြို့နယ် လူသားစာနာအဖွဲ့ တာဝန်ခံက ပြောပါတယ်။

အဆိုပါဗုံးကြဲ တိုက်ခိုက်မှုကြောင့် မိသားစုဝင် ၄ ဦး နှင့် ညီအစ်မ ၂ ဦး အသက်ဆုံးရှုံးခဲ့ရတာဖြစ်ပြီး သေဆုံးသူတွေဟာ အသက် ၁၃ နှစ်အရွယ် ၁ ဦး၊ အသက် ၁၅ နှစ်အရွယ် ၁ ဦး၊ အသက် ၁၇ နှစ်အရွယ် ၂ ဦး၊ အသက် ၂၂ နှစ်အရွယ် ၁ ဦးနဲ့ အသက် ၄၀ အရွယ် ၁ ဦးတို့ ဖြစ်တယ်လို့ ဆိုပါတယ်။

အာဏာသိမ်းစစ်တပ်က ၂၀၂၆ ခုနှစ် အောက်တိုဘာလအတွင်းမှာ ဘုတလင်မြို့နယ်ကို လေကြောင်းတိုက်ခိုက်မှု ၆ ကြိမ် ပြုလုပ်ခဲ့ပြီး အဆိုပါ တိုက်ခိုက်မှုတွေအတွင်း အရပ်သားပြည်သူ ၉ ဦး အသက်ဆုံးရှုံးခဲ့တယ်လို့ သိရပါတယ်။

မြို့တော် News Channel