ဘောလုံးကန်ပြီး နားနေတဲ့ ဘောလုံးသမားတဦး ရုတ်တရက် သတိလစ် လဲကျသေဆုံး

ဘောလုံးကန်ပြီး နားနေတဲ့ ဘောလုံးသမားတဦး ရုတ်တရက် သတိလစ် လဲကျသေဆုံး

အောက်တိုဘာ ၂၁

မွန်ပြည်နယ်၊ မုဒုံမြို့က မီတာ ၄၀၀ အားကစားကွင်းမှာ ဘောလုံးကန်ပြီး နားနေတဲ့ ဘောလုံးသမားတဦး ရုတ်တရက် သတိလစ်ပြီး မေ့လဲကျရာက သေဆုံးမှု ဖြစ်ပွားခဲ့တယ်လို့ ဒေသခံတွေက မြို့တော်ကို ပြောပါတယ်။

အောက်တိုဘာ ၂၀ ရက်နေ့၊ ညနေ ၆ နာရီခန့်က မုဒုံမြို့ရှိ မီတာ ၄၀၀ အားကစားကွင်းမှာ မြို့မ(၁) အသင်းနဲ့ ကွမ်လှာအသင်း ကစားနေချိန် မြို့မ(၁)အသင်းက ကိုသားကြီး ဆိုသူဟာ လူစားလဲပြီးနောက် ကွင်းဘေးမှာ ထိုင်နားနေရင်း သတိလစ်ပြီး မေ့လဲကျသွားခဲ့တာလို့ သိရပါတယ်။

“ကျောနံပါတ်(၂၁) ကိုသားကြီးက လူစားလဲပြီး ကွင်းအပြင် ထွက်ထိုင်နေရင်းက လဲသွားတာ။ ဖြစ်ဖြစ်ချင်း ဘေးကလူတွေ ဝိုင်းလှုပ်နှိုးကြတယ် သတိမရဘူး။ ဆေးရုံကို Y Rescue အဖွဲ့က ပို့ပေးတယ်၊ ဆေးရုံရောက်တော့ အသက် မမီတော့ဘူး။ အပူရှိန်က ၃၆၊ ၃၇ ထိ ဖြစ်နေတာ၊ အရမ်းအန္တရာယ်များတယ်” လို့ ဒေသခံတဦးက ပြောပါတယ်။

အောက်တိုဘာလ ၁၉ ရက်နေ့၊ နေ့လယ်ပိုင်းကလည်း မော်လမြိုင်မြို့၊ သာယာအေးရပ်ကွက်က ဆောက်လုပ်ရေးလုပ်ငန်းခွင်မှာ ရေသန့်ပို့တဲ့ကား ဆိုက်ရောက်ချိန် ရေလဲရန် သွားသယ်တဲ့ ပန်းရံဆရာတဦး ရုတ်တရက်လဲကျ သတိလစ်ပြီး သေဆုံးခဲ့ပါသေးတယ်။

မွန်ပြည်နယ်မှာ အယ်နီညိုဖြစ်စဉ်ကြောင့် အပူရှိန်ပြင်းထန်နေပြီး အောက်တိုဘာလ ၁ ရက်နေ့ ကနေ ၂၀ ရက်နေ့ထိ သေဆုံးသူ ၇ ဦး ရှိလာပြီလို့ ပရဟိတ လူမှုကူညီရေးအဖွဲ့တွေထံက သိရပါတယ်။

မြို့တော် News Channel