မိုးမိတ်မြို့အထွက်မှာ တိုက်ပွဲတွေ ဆက်လက်ဖြစ်ပွားနေပြီး စစ်တပ်စခန်းကုန်းလည်း အသိမ်းခံထားရ

မိုးမိတ်မြို့အထွက်မှာ တိုက်ပွဲတွေ ဆက်လက်ဖြစ်ပွားနေပြီး စစ်တပ်စခန်းကုန်းလည်း အသိမ်းခံထားရ

စက်တင်ဘာ ၃၀

ရှမ်းပြည်နယ်မြောက်ပိုင်း ၊ မိုးမိတ်မြို့နယ်မှာ အာဏာသိမ်းစစ်တပ်နဲ့ ကချင်အမျိုးသားလွတ်မြောက်ရေးတပ်မတော် (KIA) တို့ကြား နှစ်ဖက်ထိတွေ့တိုက်ပွဲတွေ ပြင်းထန်နေတယ်လို့ သိရပါတယ်။

စက်တင်ဘာ ၂၈ ရက်နေ့ မနက်ပိုင်းက စတင်ကာ မိုးမိတ်မြို့အထွက် ရွှေမြင်တင်ဘုရားအနီးက အာဏာသိမ်းစစ်တပ်ရဲ့ တပ်စခန်းအနီးမှာ အပြန်အလှန်ပစ်ခတ်မှုတွေ ဖြစ်ပွားခဲ့ပြီးနောက် ဒီကနေ့ မနက်ပိုင်းထိ တိုက်ပွဲတွေ ဆက်တိုက်ဖြစ်ပွားနေတယ်လို့ သိရပါတယ်။

“တိုက်ပွဲဖြစ်နေတာ ၃ ရက်ပြီ၊ မြို့အထွက်က စခန်းကို KIA က သိမ်းလိုက်တာမှာ လေယာဥ်နဲ့ လာကြဲနေတာ ဆူညံနေတာပဲ။ ပစ်ခတ်တာက ရပ်မသွားဘူး။ အခြေအနေအရ တိုက်ပွဲက မြို့ထဲဝင်လာတော့မယ့် အနေအထားပဲ” လို့ မိုးမိတ်မြို့ဒေသခံတဦးက ပြောပါတယ်။

မိုးမိတ်မြို့ဟာ ၁၀၂၇ စစ်ဆင်ရေးအတွင်း တအာင်းအမျိုးသားလွတ်မြောက်ရေးတပ်မတော် (TNLA) က သိမ်းယူခဲ့တဲ့မြို့ဖြစ်ပြီး တရုတ်အစိုးရရဲ့ ဖိအားပေးမှုကြောင့် ၂၀၂၅ ခုနှစ် နှစ်ကုန်ပိုင်းမှာ အာဏာသိမ်းစစ်တပ်ထံ ပြန်လည်လွှဲပြောင်းပေးခဲ့ရတာလည်း ဖြစ်ပါတယ်။

“မြို့ပေါ်ကိုပဲ စစ်တပ်က ပြန်ယူထားတာ၊ ရွာဘက်တွေကိုတော့ မပါဘူး၊ ရွာဘက်ကတွေက KIA က ထိန်းချုပ်ထားတာ” လို့ ဒေသခံတဦးက ပြောပါတယ်။

လတ်တလောမှာ မိုးမိတ်မြို့ပေါ်က ဒေသခံတွေစစ်ရှောင်ဖို့ ပြင်ဆင်နေကြရပြီး အာဏာသိမ်းစစ်တပ်ရဲ့ စခန်းကုန်းကိုလည်း တော်လှန်ရေးတပ်တွေဘက်က သိမ်းပိုက်ရရှိထားတယ်လို့ သိရပါတယ်။

မြို့တော် News Channel