ဒေါ်အောင်ဆန်းစုကြည်ကိုယ်တိုင်တောင် လက်ရှိဘယ်နေရာမှာ ရှိနေတယ်ဆိုတာ အတိအကျ မသိဘူးလို့ သားဖြစ်သူ ကိုထိန်လင်းပြော

ဒေါ်အောင်ဆန်းစုကြည်ကိုယ်တိုင်တောင် လက်ရှိဘယ်နေရာမှာ ရှိနေတယ်ဆိုတာ အတိအကျ မသိဘူးလို့ သားဖြစ်သူ ကိုထိန်လင်းပြော

အောက်တိုဘာ ၂၄

မိခင်ဖြစ်သူ ဒေါ်အောင်ဆန်းစုကြည်ရဲ့ အသံကို ၅ နှစ်ကျော်ကြာမှ ပြန်ကြားခွင့်ရခဲ့ပေမဲ့ မိခင်ရဲ့ လက်ရှိအခြေအနေဟာ ပြောင်းလဲမှုမရှိသေးဘူးလို့ ဒေါ်အောင်ဆန်းစုကြည်ရဲ့ သားဖြစ်သူ ကိုထိန်လင်း (ခေါ်) ကင်မ်အဲရစ် လူမှုကွန်ရက်ကတဆင့် ပြောဆိုလိုက်ပါတယ်။

ဒေါ်အောင်ဆန်းစုကြည်ဟာ အစောင့်အကြပ်တွေနဲ့ မြင့်မားတဲ့ခြံစည်းရိုးတွေကြားမှာ ပြင်ပကမ္ဘာနဲ့ အဆက်အသွယ်ဖြတ်ခံထားရဆဲဖြစ်ပြီး ရုပ်မြင်သံကြား၊ ရေဒီယို၊ သတင်းစာတွေနဲ့ ပြင်ပဧည့်သည်တွေကို တွေ့ဆုံခွင့်မရှိဘူးလို့ ကိုထိန်လင်းက ပြောပါတယ်။

နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကိုယ်တိုင်တောင် သူမ လက်ရှိဘယ်နေရာမှာ ရောက်နေတယ်ဆိုတာကို အတိအကျမသိဘူးလို့လည်း ကိုထိန်လင်းက ပြောပါတယ်။

“မေမေကိုယ်တိုင်တောင် သူဘယ်နေရာမှာ ရှိနေမှန်း အတိအကျ မသိပါဘူး။ မိသားစုနဲ့ ပုံမှန်ဆက်သွယ်ခွင့်၊ လွတ်လပ်တဲ့ ဆေးဘက်ဆိုင်ရာ စစ်ဆေးကုသခွင့်အတွက်လည်း ဘာအာမခံချက်မှ မရသေးပါဘူး။”

ဒါ့အပြင် တကြိမ် စကားပြောခွင့်ရတာဟာ မိသားစုနဲ့ ပုံမှန်ဆက်သွယ်ခွင့်ရတာ မဟုတ်သလို မိသားစုနဲ့ ဆက်သွယ်ခွင့်ရတာဟာလည်း လွတ်မြောက်ခြင်း မဟုတ်ဘူးလို့ ကိုထိန်လင်းက အသိပေးပြောဆိုပါတယ်။

မိခင်နဲ့ စကားပြောခွင့်ရအောင် ကူညီပေးခဲ့သူအားလုံးကို ကျေးဇူးတင်ကြောင်းနဲ့ ဆက်လက်ပံ့ပိုးပေးကြဖို့ ကိုထိန်လင်းက မေတ္တာရပ်ခံထားတဲ့အပြင် FREE HER လှုပ်ရှားမှုမှာ ပါဝင်ပြီး ဒေါ်အောင်ဆန်းစုကြည်နဲ့ နိုင်ငံရေးအကျဉ်းသားအားလုံး ခြွင်းချက်မရှိ ချက်ချင်းလွတ်မြောက်ရေးအတွက် ဆက်လက်တောင်းဆိုကြဖို့လည်း တိုက်တွန်းထားပါတယ်။

မြို့တော် News Channel