လက်ပံတန်းမှာ အာဏာသိမ်းစစ်တပ် တပ်စွဲထားတဲ့ ဘုန်းကြီးကျောင်းက ကျောင်းထိုင်ဆရာတော် မသင်္ကာဖွယ် ပျံလွန်တော်မူ

လက်ပံတန်းမှာ အာဏာသိမ်းစစ်တပ် တပ်စွဲထားတဲ့ ဘုန်းကြီးကျောင်းက ကျောင်းထိုင်ဆရာတော် မသင်္ကာဖွယ် ပျံလွန်တော်မူ

အောက်တိုဘာ ၁၇

ပဲခူးတိုင်း အနောက်ခြမ်း၊ လက်ပံတန်းမြို့နယ်မှာ အာဏာသိမ်းစစ်တပ် စစ်ကြောင်း တပ်စွဲထားတဲ့ ဘုန်းကြီးကျောင်းက ကျောင်းထိုင်ဆရာတော်ဟာ နားနေခန်းထဲ ကြိုးဆွဲချ အနေအထားနဲ့ ရုတ်တရက် ပျံလွန်တော်မူခဲ့တယ်လို့ သိရပါတယ်။

အောက်တိုဘာ ၁၄ ရက်၊ မနက် ၈ နာရီ ဝန်းကျင်ခန့်က လက်ပံတန်းမြို့နယ်အရှေ့ဘက် ဖိုးခေါင်စုရွာ လယ်ပြင်ဘုန်းတော်ကြီးကျောင်းက သက်တော် ၄၀ နှစ်ဝန်းကျင်ရှိ ကျောင်းထိုင်ဆရာတော် ဥူးသုမန ဟာ အခန်းတွင်းမှာ လည်ပင်းကြိုးချည်လျက် ဒူးတုတ်အနေအထားနဲ့ ပျံလွန်တော်မူနေတာလို့ သိရပါတယ်။

“မနက် အာရုံဆွမ်းစားပြီးတော့ ရွာသားတွေနဲ့ ကထိန်ကိစ္စ ပြောကြသေးတယ်၊ အဲ့ထိက ပုံမှန်ပါပဲ။ သူ့ကျောင်းက ဒကာမက ဆွမ်းဟင်းချက်နေတုန်း စားဆီကုန်နေလို့ သွားမေးတော့ ဒူးကွေးပြီး ပျံလွန်နေတာ” လို့ ဒေသခံတဦးက ပြောပါတယ်။

ဆရာတော် ဥူးသုမန ဟာ လက်ပံတန်းမြို့နယ်အနောက်ဘက် ဇီးဖြူကုန်းတိုက်နယ်ဇာတိဖြစ်ပြီး ငယ်စဉ်ကပင် ရဟန်းဘောင်ကို ဝင်ခဲ့သူဖြစ်တယ်လို့ သိရကာ ဆရာတော် သီတင်းသုံးနေထိုင်တဲ့ ကျောင်းမှာ အာဏာသိမ်းစစ်တပ်က မကြာခဏ လာရောက်တပ်စွဲတာတွေကြောင့် စိတ်သောက ရောက်ရတယ်လို့ မပျံလွန်ခင်တရက်က ပြောဆိုခဲ့တယ်လို့လည်း သိရပါတယ်။

ဆရာတော် ပျံလွန်တော်မူရတဲ့ အကြောင်းအရင်းနဲ့ ပတ်သက်ပြီး ဒေသခံတွေက အာဏာသိမ်းစစ်တပ် တပ်ဖွဲ့ဝင်တွေကို သံသယဝင်နေကြပြီး ဆရာတော်ရဲ့ ရုပ်အလောင်းကို ဆေးရုံပို့ဆောင် စစ်ဆေးတာမျိုး မရှိဘဲ ပျံလွန်တော်မူပြီး ၇ ရက်မြောက်နေ့မှာ မီးသင်္ဂြိုဟ်မယ်လို့ သိရပါတယ်။

အလားတူ အောက်တိုဘာ ၁၆ ရက်နေ့က မကွေးတိုင်း၊ အောင်လံမြို့နယ်၊ အုပ်ရှစ်ကုန်းရွာက ကျောင်းထိုင်ဆရာတော်ကြီးတပါးလည်း သေတမ်းစာရေးပြီး ကြိုးဆွဲချကာ ပျံလွန်တော်မူသွားခဲ့တယ်လို့ သိရပါတယ်။

မြို့တော် News Channel