အမေဖြစ်သူရဲ့ အရိုးစုနဲ့ ၂ နှစ်နီးပါး အတူနေထိုင်ခဲ့တဲ့ ဂျပန်အမျိုးသား ဖမ်းဆီးစစ်ဆေးခံနေရ

အမေဖြစ်သူရဲ့ အရိုးစုနဲ့ ၂ နှစ်နီးပါး အတူနေထိုင်ခဲ့တဲ့ ဂျပန်အမျိုးသား ဖမ်းဆီးစစ်ဆေးခံနေရ

အောက်တိုဘာ ၁၇

ဂျပန်နိုင်ငံမှာ မိခင်ဖြစ်သူရဲ့ ရုပ်အလောင်းနဲ့အတူ နေအိမ်ထဲမှာ ၂ နှစ်နီးပါး နေထိုင်ခဲ့တဲ့ အသက် ၅၃ နှစ်အရွယ် အမျိုးသားတဦးကို ရဲတပ်ဖွဲ့က ဖမ်းဆီးစစ်ဆေးနေတယ်လို့ သိရပါတယ်။

အဆိုပါဖြစ်ရပ်ဟာ ဂျပန်နိုင်ငံ အီဆဲဆာကီမြို့မှာ ဖြစ်ပွားခဲ့တာဖြစ်ပြီး မြို့အာဏာပိုင်တဦးက သတင်းအစအန မရဘဲ ပျောက်ဆုံးနေတဲ့ သက်ကြီးရွယ်အိုတဦး ရှိနေတယ်လို့ ရဲတပ်ဖွဲ့ကို အကြောင်းကြားခဲ့ရာကနေ ပေါ်ပေါက်လာတာလို့ ဆိုပါတယ်။

သတင်းပေးပို့မှုအရ အီဆဲဆာကီမြို့မှာ နေထိုင်တဲ့ တာကဲဟီရို ဟာရှီဇုမဲ ဆိုသူရဲ့ နေအိမ်ကို ရဲတပ်ဖွဲ့က သွားရောက်စစ်ဆေးမေးမြန်းခဲ့ရာ ဟာရှီဇူမဲက မိခင်ဖြစ်သူဟာ ဆေးရုံတက်နေရတယ်လို့ အစောပိုင်းမှာ လိမ်လည်ထွက်ဆိုခဲ့ပါတယ်။

ရဲတပ်ဖွဲ့က သံသယရှိတာကြောင့် နေအိမ်တွင်း ဝင်ရောက်ရှာဖွေစစ်ဆေးရာ ဧည့်ခန်းကြမ်းပြင်ပေါ်မှာ အရိုးစုသာ ကျန်ရှိတော့တဲ့ မိခင်ဖြစ်သူရဲ့ ရုပ်အလောင်းကို တွေ့ရရှိခဲ့ရတယ်လို့ ဆိုပါတယ်။

ရုပ်အလောင်းတွေ့ရှိချိန်မှာလည်း ဟာရှီဇူမဲ က “ဒီအလောင်းက ကျွန်တော့်အမေပါ၊ ဒီနေ့အထိ အသက်ရှင်နေသေးတာပါ” လို့ ထပ်မံပြောဆိုခဲ့တယ်လို့ သိရပါတယ်။

ရဲတပ်ဖွဲ့ရဲ့ ကနဦးစစ်ဆေးချက်တွေအရ အလုပ်လက်မဲ့တဦးဖြစ်တဲ့ ဟာရှီဇူမဲဟာ လွန်ခဲ့တဲ့ ၂ နှစ်ခန့်ကတည်းက သေဆုံးသွားခဲ့တယ်လို့ ယူဆရတဲ့ မိခင်ဖြစ်သူရဲ့ ရုပ်အလောင်းနဲ့ အတူ ဆက်လက်နေထိုင်လာခဲ့ခြင်းဖြစ်ပြီး၊ ရုပ်အလောင်းပေါ်မှာ ပြင်ပဒဏ်ရာရရှိတဲ့ လက္ခဏာရပ်တွေတော့ မတွေ့ရှိရဘူးလို့ ဆိုပါတယ်။

လက်ရှိမှာ ဟာရှီဇူမဲကို မိခင်ဖြစ်သူရဲ့ ရုပ်အလောင်းကို ဖုံးကွယ်ထားမှု သံသယနဲ့ ရဲတပ်ဖွဲ့က ဖမ်းဆီးစစ်ဆေးနေပြီး၊ မိခင်ဖြစ်သူ သေဆုံးရတဲ့ အကြောင်းရင်းနဲ့ သက်ကြီးပင်စင် ဆက်လက်ထုတ်ယူရန် ရည်ရွယ်ချက် ရှိ၊ မရှိကိုပါ အသေးစိတ် စုံစမ်းစစ်ဆေးနေလို့ သိရပါတယ်။

အလားတူ စပိန်နိုင်ငံမှာလည်း ပြီးခဲ့တဲ့လက အသက် ၂၅ နှစ်အရွယ် အမျိုးသားတဦးဟာ ဖခင်ဖြစ်သူရဲ့ ပုပ်ပွနေတဲ့ ရုပ်အလောင်းကို ဗီရိုထဲမှာ ၁ နှစ်ခွဲကြာ ဝှက်ထားခဲ့တယ်ဆိုတဲ့ စွပ်စွဲချက်နဲ့ ဖမ်းဆီးခံခဲ့ရပါတယ်။ စပိန်ရဲတပ်ဖွဲ့ကတော့ အဆိုပါအမျိုးသားဟာ ဖခင်ဖြစ်သူရဲ့ ပင်စင်ငွေတွေကို ဆက်လက်ရရှိဖို့အတွက် အခုလို လုပ်ဆောင်ခဲ့တာလို့ ယူဆထားပါတယ်။

Ref & Photo: The Sun

မြို့တော် News Channel