ကြေးဆင်းတု ဗုဒ္ဓရုပ်ပွားတော်တွေရဲ့ လက်တွေကို ဖြတ်တောက်ခိုးယူခဲ့သူဟာ အသက် ၁၃ နှစ်အရွယ် ကလေးငယ် ဖြစ်နေ

ပဲခူးတိုင်း၊ တောင်ငူမြို့ အမှတ်(၁) ရဲစခန်းအနီး ဘိုဘွားရိပ်သာစေတီရှိ ကြေးဆင်းတု ဗုဒ္ဓရုပ်ပွားတော်တွေရဲ့ လက်တွေကို လွှနဲ့ တိုက်ဖြတ်ကာ ခိုးယူခဲ့တဲ့ ကလေးငယ်တဦးကို ဖမ်းဆီးရမိခဲ့တယ်လို့ သိရပါတယ်။

ဇူလိုင်လ လလယ်လောက်က ဖြတ်တောက် ခိုးယူခံခဲ့ရတာ ဖြစ်ပြီး ကြေးဆင်းတု ဗုဒ္ဓရုပ်ပွားတော်တွေရဲ့ ဝဲဘက်လက်ကောက်ဝတ် အရင်းကနေ ဖြတ်တောက်ခံခဲ့ရတာ ဖြစ်တယ်လို့ သိရပါတယ်။

ဩဂုတ်လ ၂၃ ရက်နေ့ မနက်ပိုင်းက အာဏာသိမ်းအစိုးရ လက်အောက်ခံ တောင်ငူမြို့ အမှတ်(၁) မြို့မရဲစခန်းက နယ်ထိန်းခေါင်းဆောင်နဲ့ အဖွဲ့ဟာ လှည့်ကင်းဆောင်ရွက်နေစဉ် တောင်ငူမြို့ ဆေးရုံနောက်ကျောဘက် ကျုံးပတ်လမ်းမှာ မသင်္ကာဖွယ် ကလေးငယ်တဦးကို တွေ့ရှိခဲ့တာကြောင့် စစ်ဆေးခဲ့တယ်လို့ ဆိုပါတယ်။

အဆိုပါ အသက် ၁၃ နှစ်အရွယ် ကလေးငယ် ဇင်မင်းထက်ရဲ့ လက်ထဲမှာ ကြွပ်ကြွပ်အိတ်အမည်းနဲ့ ထည့်ထားတဲ့ ပျောက်ဆုံးနေတဲ့ ကြေးဆင်းတု ဗုဒ္ဓရုပ်ပွားတော်တွေရဲ့ လက်တွေကို တွေ့ရှိခဲ့ကြတယ်လို့ ဆိုပါတယ်။

"အသက် ၁၃ နှစ်အရွယ် ကလေးငယ်တဦးက ဘုရားလက်တော်တွေကို လွှနဲ့ ဖြတ်တောက်ရဲတဲ့အထိ ဖြစ်လာတာ စိတ်မကောင်းစရာပါ။ သူ့နောက်ကွယ်က ခိုင်းစေတဲ့သူ ဒါမှမဟုတ် ကြေးအရောင်းအဝယ်လုပ်တဲ့ ဆိုင်တွေ ရှိမရှိ ထပ်မံ စုံစမ်းပေးစေချင်ပါတယ်" လို့ လူမှုကွန်ယက် အသုံးပြုသူတွေက ထောက်ပြ ပြောဆိုနေကြပါတယ်။

လတ်တလောမှာတော့ ဗုဒ္ဓရုပ်ပွားတော်တွေရဲ့ လက်တွေကို ဖြတ်တောက်ခိုးယူခဲ့တဲ့ အဆိုပါကလေးငယ်ကို ရာဇသတ်ကြီးပုဒ်မ ၃၇၉/ကျင့် ၅၄ နဲ့ တောင်ငူမြို့မရဲစခန်းမှာ အမှုဖွင့်ဆောင်ရွက်ထားတယ်လို့ သိရပါတယ်။