အိမ်စီးကားတစီးကို သေနတ်ပြ ခြိမ်းခြောက်ပြီး လုယူမောင်းနှင်ထွက်ပြေးသွား

မွန်ပြည်နယ်၊ လမိုင်းမြို့၊ ဘူတာရပ်ကွက်မှာ အိမ်စီးကားတစီးကို သေနတ်ပြ ခြိမ်းခြောက်ကာ လုယက်သွားတဲ့ဖြစ်စဉ် ဩဂုတ်လ ၂၅ ရက်နေ့ မနက်ပိုင်းက ဖြစ်ပွားခဲ့တယ်လို့ သိရပါတယ်။

အသက် ၃၀ ဝန်းကျင်အရွယ်ရှိ အမျိုးသားတဦးဟာ ဆိုင်ကယ်နဲ့ ရောက်ရှိလာပြီး လမ်းဘေးမှာ ရပ်ထားတဲ့ အိမ်စီးကားတစီးကို ဝင်တိုက်ခဲ့ပြီးနောက် ကားထဲမှာထိုင်နေတဲ့ အမျိုးသမီးကို သေနတ်ပြခြိမ်းခြောက်ကာ ကားပေါ်က ဆင်းခိုင်းပြီး ကားကိုပါ ယူဆောင်သွားခဲ့တယ်လို့ သိရပါတယ်။

"လုသွားတဲ့သူက ဆိုင်ကယ် ဦးထုပ်ဆောင်းပြီး မိုးကာ ဝတ်ထားတယ်၊ ဆိုင်ကယ်နဲ့ အိမ်ရှေ့ရပ်ထားတဲ့ ကားကို သူက အရင်ဝင်တိုက်တာ၊ သေနတ်ထုတ်ပြီး ကားပေါ်က ကားပိုင်ရှင် အမျိုးသမီးကို ဆင်းခိုင်းပြီး ကားကို သူက မောင်းသွားတယ်၊ ကားထဲမှာ ကလေး ပါသွားတယ်၊ ပါသွားတဲ့ ကလေးကို လမ်းမှာ ချထားခဲ့ပြီး သူက ထွက်ပြေးသွားတာ" လို့ ဒေသခံတဦးက ပြောပါတယ်။

လုယက်ခံယူရတဲ့ ကားဟာ Ford EcoSport အမဲရောင်၊ ယာဉ်အမှတ် 1R/7598 ဖြစ်ပြီး ကာယကံရှင်က အာဏာသိမ်း စစ်တပ်လက်အောက်ခံ ခလရ(၁၀၆) တပ်ရင်းကို တိုင်ကြားထားတယ်လို့ သိရကာ လုယက်သွားသူ စီးနင်းလာတဲ့ ဆိုင်ကယ်ကို ခလရ (၁၀၆) က စစ်သားတွေက လာရောက်ယူဆောင်သွားတယ်လို့ သိရပါတယ်။

လက်ရှိမှာ ခလရ (၁၀၆) က ကားလုယူ မောင်းနှင်သွားသူကို အပူတပြင်း လိုက်လံစုံစမ်းနေတယ်လို့သိရပြီး ခုမနက်ပိုင်းထိ ကားကို ရှာဖွေတွေ့ရှိနိုင်တာ မရှိသေးသလို ဘယ်လမ်းက မောင်းထွက်သွားတယ် ဆိုတာကိုလည်း မသိရသေးဘူးလို့ ဆိုပါတယ်။

မွန်ပြည်နယ် လမိုင်းမြို့မှာ မော်တော်ယာဉ်တွေ မကြာခဏ လုယက်ခံနေရပေမဲ့ ပြစ်မှုကျူးလွန်သူတွေကို ဖမ်းဆီးနိုင်တာ နည်းပါးနေတာကြောင့် လုယက်မှုတွေ ပိုမိုဆိုးရွားလာတယ်လို့ သိရပါတယ်။